為了實現媽媽遺願，我成為了女兒國唐僧: 815

今日，要性感啲好吖，定係清純啲好呢，雖然個衰人都剩係想除走佢…佢話過校服入面著性感內衣係一件好正嘅事，例如揭起條裙見到入面有條透pat lace黑底…唔係我唔想entertain佢，而係夏天校服白裙好易透晒出嚟嘛…
不過而家已經暑假，所以…就著返可愛啲啦，嗯，有無粉色系嘅moulded bra呢…就呢個啦，加埋件背心就會喺側邊睇到個cup同埋條肩帶，雖然會益咗街外人，不過無所謂啦，都係因為我靚啫；配埋條同色系嘅少女底底，加埋條白色熱褲，嗯…如果彎腰就會突少少底褲邊出嚟，你哋班仔流鼻血唔關我事呀，呢個唔係我初衷嚟，又無人迫你哋昅我嘅。今日嘅我好少女呀，Apple Watch bye。
『我早咗起身，嚟妳樓下接妳？』
男人就係咁，想佢體貼啲嗰陣就喺度咿咿哦哦，又呢樣又嗰樣，到你唔需要佢嘅時候，就會主動做埋啲無乜貢獻嘅無事獻殷勤，去到最尾你咪又係想我上嚟你屋企，扮乜嘢吖…最重要係本小姐而家絕對唔想遊車河！其實以前佢都有問過我可唔可以上嚟我屋企，你估我唔知咩…有邊個男仔唔想同女朋友喺佢晚晚瞓覺嘅地方上面乜嘢喎，當時我話媽咪唔使返工成日喺屋企，呢個係其中一個原因啦，另外就係我未至於想分享自己嘅私人生活空間畀佢睇，加埋我屋企同佢嘅都重有一段仔距離，所以唔想佢諗埋啲乜，知我住邊咁就算。
但而家…好彩佢已經放棄咗呢個念頭。
所以，換好衫嘅我就落咗去搭MTR，等佢喺佢樓下接我一齊食個brunch先。
咦…點解呢個人會喺度嘅？
我：「喂！傻瓜！」我大力咁拍一下佢背脊。
健：「嘩！Ku…Ku…Queenie早晨。」條友明顯地俾我嚇到震咗一震，三魂唔見咗七魄。
我：「做乜咁驚喎，你想叫我乜咪乜囉，得我哋兩個人喺度咋嘛…」




健：「妳就唔好玩我啦，Queenie…」
我：「鬼得閒玩你呀，你再係咁嘅款下世都唔使指擬溝到女…」除非你係超靚仔嘅怕醜仔或者屋企有錢到漏油嘅油王小朋友。
健：「呢啲嘢知就算啦，使乜講出嚟，我都唔想…」
我：「我今日靚唔靚女呀？」
健：「靚…靚…妳不朽都靚女㗎啦。」
我：「咁同你心目中嘅Kuromi比邊個靚啲？」
健：「妳叫我…點講出口喎…而家…」
我：「有乜唔講得出口，你再講多次鍾意我都得㗎，嘻嘻。」
健：「我覺得…Kuromi會純真啲…份人簡單啲，無你咁叻女，唔會大膽到同男仔住。」
我：「都唔知你係讚我定彈我…不過如果你啱呢type，就好心你更加主動啲啦，你要記住最乖嘅女仔都係會俾最曳嘅男仔呃，大個少少就唔會再有呢啲女仔俾你識到。」




健：「道理嘅嘢…就係人都明。」
呀，差啲唔記得我有正經嘢要問佢。
我：「唔講呢啲住先，你而家去邊度呀？」
健：「呀…我今日去買書呀。」