為了實現媽媽遺願，我成為了女兒國唐僧: 812

我身旁嘅人，全部都係中學生，或者嚟緊係升U嘅，佢哋所有人個樣都好精靈，未必個個周身名牌，但無論點都係得體、整齊、企理，就算唔係主動活躍，都唔會死蛇爛鱔呆呆下咁；可以想象得到佢哋會經常出嚟參加各種活動，認識同自己年紀相約嘅朋友，進行各種交流，返屋企再同自己父母分享…從中燒咗唔知幾多錢，要知道租船嘅錢都唔嘢少，食嘢又係一筆，當然YY係會出埋我嗰份。
佢哋應該唔會明白跳樓梯同掟磚落集水區嘅樂趣，唔會敢夜晚係街拆人個單車鎖同跳欄入地鐵站搭霸王車，亦唔會無聊到上堂轉筆蓋落堂就掟BB彈入人哋窗口攪人隻狗。佢哋係矜貴嘅小朋友，有一個好嘅學習環境，有自己房溫書，父母有知識教佢哋，可以隨時請人補習，畀錢去好啲嘅直資中學讀書，未來重可以去外國升學；會經常去正規嘅餐廳品嚐環球美食，放假會搭飛機去旅行見識世界，亦會使好多錢落課外活動…樂器…運動…藝術…
但我自由自在，有自己間屋，身邊亦出現過好多女仔，我唔信你哋有得早過我衰十一…
世界係唔公平，我一早就知，但我唔會唔開心。
因為媽咪一定係喺天上面每日都守護住我。
如果唔係QQ點會過咗嚟同我一齊住。
而且重為我帶嚟YY呢趟渾水…
我：「YY，妳都算好帶挈咯。」我一手跨過佢條頸，右手下垂咁放喺佢嘅胸前，十足十少爺仔強搶民女咁嘅款。
Y：「做乜嘢呀，我係咁閪㗎喇，無得投訴。」
我：「點會投訴呢，我都不知幾咁愛妳，直頭想而家就攬住妳同妳打茄輪。」




Y：「咪教壞啲細呀！我唔要求你表現出色，但都唔該同我醒醒定定，正正常常，唔好死下死下咁。」原來攬女去船P都可以係受難嚟…
我：「我盡力啦…不過我有啲嘢想問下。」
Y：「問啦，但我唔一定答到你嘅問題。」
我：「團長…Alfonso佢…有無女㗎？」
Y：「你認為呢啲咁嘅款嘅男仔有無可能無女？」
我：「按道理就無可能無，出嚟玩一日都隨時有斬獲啦…」
Y：「咁咪係囉，重問嚟做乜？」
我：「見佢喺度遊來遊去咁身邊無女嘅？」
Y：「呢度咁多妹妹仔，大把人昅實佢，佢唔會掂呢度啲女㗎，基本上就係你見到神神化化咁，據我所知佢喺學校係有女朋友嘅，重要唔止一個，出面重有無我就唔研究喇。」
我：「嗯哦，咁妳有無起痰呀？」




Y：「吓？我使唔使呀…佢呢啲當玩下或者做friend就OK，真感情嘅話咪搞。」睇嚟無估錯YY係玩得嘅女仔，只不過唔知道佢係乜狀況，希望佢好朋友唔會學佢啦，如果QQ無呃我嘅話，佢都係一直正經同佢男朋友拍拖，雖然佢都有應酬瘟神，不過純粹敷洐下，或者搵著數？