為了實現媽媽遺願，我成為了女兒國唐僧: 797

W：「咁你哋嗰陣做過啲乜呀？」
我：「基本上就無乜…抱過囉，都試過嘴仔掂嘴仔，但又唔係伸埋條脷入去，所以唔計嘅。」
W：「乜話，咁都可以唔計？！你都夾硬嚟嘅。」
我：「嗯…因為太表面，同埋都無感覺，只係見到人哋咁做自己又咁做，但係乜都唔識。」
W：「估唔到你會咁斯文喎。」
我：「因為…當時嘅我唔知道原來係要上下其手，依柔佢心口又乜都無，硬係覺得怪怪地。」
W：「咁你同人哋一齊咗幾耐呀？」
我：「個幾月咋，後尾佢話六年班準備升中要畀心機讀書，話遲啲再繼續同我拍拖，當時我信咗佢，後尾調咗位就好少交流，就係咁直到畢業，然後就無再搵過對方了…」我真係一面天真。
W：「哦，咁人哋欠咗你喎，搵返佢追數啦。」
我：「又好似唔係幾好嘅…」




W：「唔會嘅，以前嘅嘢有回憶㗎嘛，同佢分享返以前大家有幾低B可以笑下吖。」
我：「都係…但自從中二之後就無再收到佢嘅消息，好似話已經移咗民。」
W：「而家乜年代呀！電話㩒幾下就搵到人啦。」
我：「係，不過既然講回憶咯，就等中學畢業埋先搵佢好似好啲，到時搵佢追數都可以賺多啲。」
W：「唔知你諗埋啲乜，見到個樣就覺得鹹濕。」
我：「利疊利，脷疊脷，認真和味，少女對奶會發脹，AA變雪梨。」唔好問我喺邊學返嚟…
W：「我完全唔明，點解會有女仔肯同你做friend…」
我：「哈…之但係，妳都會理我吖。」
W：「所以話坐喺你隔籬都係一種不幸嚟。」
無計啦，呢個世界就係有好多不幸少女；講起幸運，結果就發生啲好好彩嘅嘢，正當我哋主菜嚟到嘅時候，有四大女神入咗嚟呢間餐廳；其實諗下都知好正常，呢度啲位好坐，又唔使對住啲爛身爛勢嘅人，畀多少少錢就可以食啲好些少嘅嘢，相信呢度都係佢哋嘅常規飯堂嚟，只不過我今次真係俾佢哋捉個正著。




咁佢哋四個都識我，點都會望一望過嚟，Uranus行先好似覺得我哋無乜特別，Zilvia就非常斯文咁做咗一下眼神交流，QQ佢露出一個恐怖嘅招牌笑容，而Yvonne就冷笑一下彷彿同我講你死定咁。
W：「你朋友喎。」
我：「係呀，無特別，唔使理佢哋。」
W：「無人話要理佢哋，嚟吖，我分啲飯畀你。」
然後佢就潷咗一大堆炒飯落我個鐵板上面，重有少少牛脷，方死人哋睇唔到咁。
W：「我又要試啲牛扒。」
佢嘅意思當然就係叫我鋸畀佢，係爭在未有要我喂埋入佢個口度，但我係feel到佢想咁做嘅。