為了實現媽媽遺願，我成為了女兒國唐僧: 793

Q：「Core phy chem囉，唔玩嘢喇，最後一科，都係econ，ICT，或者文科，但如果得我一個人去同文科班上堂又好似…」
原來…即係只要我入到physics班，基本上就會有六科相同，第七科都唔知讀唔讀得嚟，揀乜都無所謂啦，呀，或者問埋阿健先，人生都唔止得女神一個人嘅，真係要人幫手嘅話傻仔健都係個好選擇，如果我幫佢實現到夢想，怕且要佢日日幫我補習都得呀！
其實唔使咁煩嘅，諗起日後唔使再對住中西史geogar就爽，而QQ亦都可以告別佢嘅地獄家政，呀…講起家政好似有人話要請我食曲奇…
嗯，我係無期望過右女神會整任何嘢畀我食…
話咁快就到星期三，諗起星期四就煩。
我：「喂，你額外嗰科讀乜呀？」
健：「Econ好似係有用啲嘅，但係又覺得好悶，所以…我諗住揀ICT，就算讀唔到好成績，咪當玩下電腦都無壞，好過日日背書。」
我：「不過Econ多女喎，可以同文商班啲同學一齊讀。」
健：「唔好再講女，諗起都驚。」
我：「做乜呀，重未嬲完Kuromi呀？」




健：「唔係嘅…但同佢哋都相處唔到，你咁講商科班都有人讀ICT㗎，唔係所有人讀econ。」
我：「呢層我就唔知，不過有都係男仔多？」
健：「專心讀書啦，學校唔係俾你用嚟溝女㗎，況且…你問我嚟做乜啫，你都係跟住屋企個女神嚟揀㗎啦，係咪？」
唓，講啱一半咋，我點都要讀physics㗎喇，而家就算佢轉我都唔會轉…同埋，我決定咗要揀ICT，因為同阿健一齊玩電腦都唔錯，加埋我記得Carmen有讀，佢係我生命中第一個正經『玩』嘅女仔，所以想同佢有啲共通點。
上到課室，全部枱面已經擺咗張點心紙喺度，真係兒戲，決定人生就好似食車仔麪諗揀乜餸咁。
我：『M1定M2？』我不厭其煩確認多次。
Q：『1』外加針筒刀槍鎚仔士巴拿炸彈emoji。
比我預期中簡單，一分鐘都唔使就剔完，而Wendy就望住張紙發咗一陣呆，我唔想影響佢就費事出聲嘞，大概五分鐘到佢快速填完就反轉咗張紙…其實都知唔同班㗎啦，揀乜都係咁。
鄧：「好喇，畀多三分鐘你哋，唔可以再諗喇，收完之後就輪到我哋先生打仗…」
收晒啲點心紙之後，Miss Tang就懶得理我哋離開咗課室，而我作為一個無知嘅學生又點會知道佢要同其他幾班嘅先生點打仗；一齊焗點心？