thriXt Qantasy 純文字安眠之作 (New: - U2K - 一直上架): 792

到咗中午，有人搵先生，有人搵社工，有啲唔讀書嘅喺球場打波曬太陽，我就當然係返屋企搵QQ，因為只有佢先係我嘅明燈。
我：「Queenie，點算好呀？聽朝要剔科喇。」
Q：「有乜點算，你想讀乜咪讀乜。」
我：「唔係呀，我連總共要讀幾科都唔知。」
其實Miss Tang有講，不過文理商有唔同情況，佢講到一嚿嚿咁，而且本身我就諗住問QQ。
Q：「乜都唔知就讀中西史加文學，掂呀。」
我：「唔好玩我啦，我剩係讀理科㗎咋。」
Q：「咁你首先要同學校申請drop咗中英文佢。」
我：「…，不如妳讀乜我讀乜，幫我揀埋啦。」
Q：「No ar，我唔要為你嘅人生負責。」




我：「妳無得唔負呀，本來無妳喺度我就唔會入到理科班，係妳搞出嚟㗎。」
Q：「好喇好喇，首先而家已經轉咗制，最多可以揀自由八科，讀埋延伸數就係八點五科，當然我哋呢啲學校係支援唔到咁多科嘅，除非你自修多一科，剩係講理科班，本身我哋係預咗你揀M1或者M2，如果你讀唔掂就之後自己drop，full cover係七點五科，如果你覺得自己水皮就可以揀少一科選修科，或者讀讀下drop都得，一般嚟講學校最低要求會要你讀基本嘅四加二，因為所謂通識已經唔再計到分，所以而家應該唔會出到以前只有一個選修科嘅情況，如果唔係大學淨係得你四個grade都唔知點收你…」
QQ…真係好犀利，不枉我咁崇拜佢。
聽完一大輪，我知我要讀好多嘢，但唔係重點。
我：「咁妳嘅選修科係？」
Q：「一係你聽日畀張紙我剔埋算…」
我：「話我知啦，我參考咋，唔係跟足妳。」
Q：「我重諗緊揀M1定M2，Uranus肯定係M2，Zilvia係M1，Yvonne唔肯講。」
我：「你唔係要照顧Zilvia咩？即係M1…」
Q：「咁揀科又唔係齋睇friend嘅，同Uranus上堂會開心啲，同埋無乜女揀M2佢想我陪佢。」




我：「真頭痛，但M1好似易啲？」
Q：「係呀，但無咁著數，攞星個分高過M2一截，我諗睇返你之後想做乜嚟揀啦。」
我：「我無所謂，跟返妳算啦，我兩邊啲分都差唔多，亦無諗住要做乜。」
Q：「不如你去陪下Uranus？」
我：「吓，我做乜要去陪佢？」
Q：「佢對住啲仔完全不為所動，測試一下你會唔會氹得掂佢。」
我：「又唔見妳叫我去測試一下令到Zilvia可以正常咁接受男人？」
Q：「你搞到Uranus變蕩婦我無乜所謂，但如果你嚇到Zilvia要睇精神科我就真係死都唔掂，算，都係讀M1比較穩陣，起碼商科全部用得返。」
我：「咁另外嗰啲呢？」