為了實現媽媽遺願，我成為了女兒國唐僧: 779

瘟：「咁講都有道理…但唔搵佢又可以點？」
我：「當然係掉返轉等佢哋搵你啦。」
瘟：「但…如果佢哋好想搵都應該主動搵咗啦。」
我：「唔可以咁講，有時啲嘢係爭緊個機會。」
瘟：「咁可以點，學校度已經無晒可以撞到嘅活動喇喎，即係要過埋暑假…」
我：「機會嘅嘢，就等我多事幫你處理下啦。」
瘟：「你可以點幫到我？」
我：「你有無啲型仔啲嘅相？」
瘟：「都有嘅，陸運會…訓練營…唔知啱唔啱用…」
我：「嗱，我就唔知人哋對你真發姣定假發姣，無論如何，我攞你張相送畀佢哋就點都唔會錯嘅，然後你咪喺相後面寫句message，再留埋contact，咪睇下佢哋搵唔搵你囉，咁如果人哋唔想嘅話都唔使你尷尬嘛。」




瘟：「OK喎，你個曳曳仔果然係經驗老到…呀！決賽嗰日德爺話返嚟幫手影相喎，或者可以叫佢幫下手，但怕太遲…」
我：「咦，學校係咪有即影即有？咁德爺即場操刀咪得囉，好似cheki咁，上次初賽嗰兩隻妹都有嚟，咁決賽…」
瘟：「你個死人頭吖！佢哋嚟咗你做乜唔同我講呀？」佢個樣做乜急到搵援交妹唔記得帶錢咁…
我：「嗰陣…我鬼知你乜女都啱咩，我以為你係非女神級唔食嗰啲人嚟，咪無多事。」
瘟：「嗱，講清楚先，我唔係乜女都啱，只係…既然人哋對自己有興趣，認識下都無壞嘅，就算發展唔到都可以多個朋友吖，係咪先？」
我：「你鍾意啦，你唔好中出即飛攪到人哋想輕生就得，我唔想因為我嘅關係害咗人。」
瘟：「我似唔似啲咁嘅人呀？！你都無譜嘅，正一山草藥嚟，乜都講得出。」
我：「點知你喎，見悶就乜女都唔放過。」
瘟：「唉，暑假嘛，我都係想有人可以陪下，打下波又好，睇下戲又好，行街食飯又好…既然同自己講咗放棄Queenie，無謂再約佢浪費大家時間。」
男仔就係咁，無女就嫌悶，識女大過天，但有女嗰陣就可能嫌女仔好煩，連打機時間都無埋。




我：「小心啲妹妹仔當你老襯，食窮你呀。」
瘟：「咁嗰少少我又唔係畀唔起，打孖都得呀，但如果…佢哋咁現實嘅話可能我都會現實少少。」
我：「又嚟互相傷害咁話…呀，係呢，你知唔知道今日lunch之後學校有乜活動。」
處理完一筆，我開始要思考下一步嘅動作。
瘟：「中一二嘅話有社工嚟做情緒健康講座…」
我：「嘩，咁悶㗎，講下援交問題，色情資訊管制，風化案分享，青春期兩性煩惱，甚至乎毒品禍害都無咁悶吖。」