thriXt Qantasy 純文字安眠之作 (New: - U2K - 一直上架): 771

瘟：「啊，我無話佢假，應該佢連喺我面前扮嘢都懶啦…可能係我自我中心啦，我至少覺得，佢同我一齊相處係要更加開心，所以，我係好失望，對自己更加失望，當一個本來自己認為係完美嘅女仔嚟到自己身邊變成唔完美，呢個打擊好大，就好似明明某一科係自己最拿手，亦都準備充足，但到派卷嘅時候先發現有一題long quet完全睇唔明，跟住就連做好其他題目嘅心情都無埋，又或者…嗌完肉醬意粉，上到枱先發覺無芝士…嗰種frustrate嘅心情，實在，唉…」
我係知道，自己同佢哋呢啲上等人係生活喺唔同嘅世界，但瘟神佢會唔會奇葩咗啲…喺我眼中，識咪識，唔識咪唔識，有幾多係整定，煮到埋嚟就要食㗎啦，瞓醒滿血復活又一條好漢。
下下都同自己拗頸，怕且會過得好辛苦。
我：「嗯，或者…唔啱就係唔啱，佢唔係你嘅答案。」
可能，你會知道邊個係錯嘅答案，但唔等於你會知道邊個係啱嘅答案，係咪咁呀？大卡車？
我：「你有乜嘢決定，隨你鍾意啦，其實又唔關我事嘅，我都唔知可以點幫你。」
瘟：「唔使，你聽我講嘢就已經係幫咗我，呢啲嘢…剩係敢同你呢個玩世不恭不理世事嘅死仔包講，其他人太危險。」
我：「唔驚我出賣你，報告畀Queenie知？」
瘟：「我諗，你知道點樣係對佢最好。」
的確係，我唔想節外生枝令佢心煩。




我：「如果你鍾意成熟嘅女仔，姐姐咁款，不如試下Bubble？」
瘟：「欸…唔係幾好咁噃，完全唔啱feel…」
我：「呀！我有樣嘢想請求下社長你㗎！就係…如果…我哋贏埋下一場嘅話，你可唔可以放過Bubble師姐呀？」
瘟：「乜…嘢放過呀…」佢驚訝咁望住我。
我：「即係，唔使佢同你打茄輪呀！」
瘟：「頂！點解你乜都知㗎？！你條友同Bubble咁熟㗎？你唔係諗住同我講佢暗戀我呀？」
我：「啊，如果佢暗戀你咁又點呀？」
覺得幾好玩，等我試下佢先。
瘟：「快啲講呀！係真定唔係！」佢猛烈地搖我。
我：「呀呀呀！我鬼知咩，同佢都唔熟…」




瘟：「屌，你個pk仔，又喺度玩我！」
我：「做乜呀？好傷心呀？定係好失望？」
瘟：「無…我對佢又唔係乜嘢，如果佢鍾意我，我都唔知應該點…喂！咁你點解知道我哋嘅打賭㗎，應該得我哋四個知㗎咋喎。」
我：「你理得我，知道咪知道。」
瘟：「如果唔係Bubble…係咪黃社個低B仔漏口講咗出去，重有無其他人知？！」