為了實現媽媽遺願，我成為了女兒國唐僧: 769

我：「吓？咁樣…佢對你未必係太差啫。」
瘟：「嘻嘻，點呀，係咪葡萄呢？」
我：「我做乜要葡萄，係都葡佢條仔啦…」
瘟：「無呀，臨走嗰陣，我叫佢拆開份禮物…就好似，禮貌上…對一個普通人咁惜咗一下，嗯，我寧願…佢有其他反應，或者直接拒絕我，總之…我應該唔係可以令佢幸福嘅人，就交畀你繼續努力啦，交叉仔。」
我：「乜，乜喎，我同佢無乜嘢㗎咋。」
瘟：「你敢話你對佢無遐想？」
我：「咁係因為佢靚女啫，都明知無可能…就連你都感動唔到佢，我做乜要做無謂嘅幻想。」
瘟：「但係我次次見到你喺佢隔籬，佢就會特別開心，唔好睇少自己啦，雖然你傻更更咁，但可能真係有一種難以形容嘅魅力。」
我：「唔好咁講啦，第二個都算，你讚我實在係受唔起，明明你好我咁多，家庭環境好，讀書叻，運動又好，做到嘢受人歡迎…」
瘟：「哈，我知呀，就係Queenie唔受咋嘛！同你講呀，雖然我唔再追佢咋，但唔代表我唔鍾意佢㗎，如果有一日佢親近返我，我嘅大門會隨時為佢而開！只要我重係單身…」




我：「其實，如果你將眼光放遠…再放返低啲，應該…大把女仔俾你揀。」
瘟：「你咁講，好似知道啲乜嘢咁喎？」
我：「無乜嘅，的確係有其他師妹睇中你。」
瘟：「係？係邊個嚟㗎？」
我：「我唔識佢㗎，只知道佢哋係中二。」
瘟：「乜話？！重要有個哋字？快啲講啦，到底係邊班㗎？得個知字都好，靚唔靚女㗎？點解你可以識得咁鬼多女仔…」
我：「咪話咗我唔識，最多第時見到我再八下係邊個啦，樣都OK嘅，鄰家女孩咁，一個就比較清純，另一個就百厭啲。」
瘟：「唔識…唔好玩我啦，師兄。」
我：「咪亂講好喎，你先係師兄。」
瘟：「哈，計讀書我就係師兄啫，但喺呢方面，我只係一個師弟嚟。」




我：「瘟…Vincent師兄…到底你想講乜…」
瘟：「我哋學校form three入面，幾乎可以肯定係第一個失身嘅男仔，重唔係師兄？」
我：「喂喂喂！唔好亂講呀！我唔會認㗎！」
瘟：「唔使你認，當個個都咁講，重要唔似講笑，我都係唯有信嘅啫。」
我：「信唔信都好，唔好叫我做師兄。」
瘟：「唔好咁小氣啦，我青頭仔嚟㗎。」
佢用純真又誠懇嘅眼神嚟望住我，閃亮出點點嘅光彩…但呢一刻我剩係覺得好噁心，都唔知佢想點；好彩我唔係女嚟，如果唔係睇怕我會俾佢電親，再學AV入面啲女優咁捉住佢隻手，放喺自己身上。
諗深一層，QQ對佢完全免疫先係唔正常。
如果要話個原因係對男朋友忠貞，又好似站唔住腳，因為佢平時同我一齊都曳曳哋。
瘟：「其實我好想將第一次交畀佢。」