為了實現媽媽遺願，我成為了女兒國唐僧: 768

我：「嗱，我係唔會干涉我朋友嘅任何感情事宜，亦都無資訊提供畀你，幫唔到你…不過，Queenie咁靚女，係男仔都想食咗佢㗎啦，無乜特別。」
瘟：「唔係咁喇，我唔係想食佢，而係真心欣賞佢，應該話…食唔係重點嚟。」
我：「你咪自己同佢講，我唔會傳話。」
瘟：「唔使喇，我已經決定咗放棄。」
我：「講到咁鍾意人，做乜突然之間又咁決絕？」
瘟：「同佢相處咗幾個月，所有嘢都好正常，但…無論我做啲乜，就係見唔到佢喺你隔籬嗰種自然嘅表情同笑容。」
我：「喂喂喂…我同佢係朋友嚟㗎咋，唔好亂諗喎，你…又唔係唔知佢一路有男朋友。」
瘟：「我知呀，不過呢個年代有仔都唔代表啲乜嘅啫，結咗婚都可以離啦…總之，我覺得勉強無幸福，唔想令佢覺得煩…唔知對你嚟講，呢個係咪好消息喇。」
我：「如果係咁…你又做乜送份咁貴重嘅生日禮物畀佢？收唔返㗎喎。」
瘟：「你個死仔包！重話唔知…睇怕佢乜都同你講晒…或者，係唔忿氣掛，想同自己鬥氣，送啲真係貴重嘅嘢畀佢，睇下會有乜嘢反應。」




我：「咁睇嚟，你收唔到預期效果。」
瘟：「如果一般女仔收到份咁嘅禮物會點？」
我：「應該就…心心眼啦，起晒水咁抱住你，就算唔鍾意你都可能即刻同你打茄輪。」
瘟：「無咁嚴重掛…佢都唔係咁嘅女仔。」
我：「睇人啦，最衰我唔係女仔，如果唔係我OK嘅，嘻嘻…受人錢財，替人消災…不過Queenie屋企咁有錢，呢啲唔算得係啲乜啦。」
瘟：「佢屋企真係咁有錢？我都唔係好知…但，無論點都係一份有價值嘅禮物，我睇唔到佢有幾驚喜或者感動。」
我：「係咪叫賭輸咗？何必咁衝動送咁貴嘅嘢…」
瘟：「無嘅，我鍾意佢，無論佢鍾唔鍾意我都好，我想令佢開心，希望份禮物真係有價值同有用，而唔係俾佢隨手放喺一二角，至少…第時間唔中戴住隻錶喺手會諗起我吖。」
我：「都明嘅，但係…你真係放得低？」
瘟：「我問你吖，你同佢係friend，你覺得我有無機會成功吖？」




我：「微乎其微。」
瘟：「咪係囉，無必要強人，強己所難…總之，我唔會再做主動，但會保持朋友關係嘅，咪等慢慢淡囉，你呀，唔好同佢講我今日講過嘅嘢呀，我唔想佢諗埋啲唔知乜。」
我：「放心啦，我同佢未至於咁…而且佢本身有仔，我完全唔會理佢呢啲嘢，反正鍾意佢嘅男仔多到數唔晒。」
瘟：「其實…嗰晚佢惜我，已經覺得係goodbye kiss嚟。」吓？！乜話！女神妳竟然惜佢？