為了實現媽媽遺願，我成為了女兒國唐僧: 740

我：「既然你唔服輸，不如用我哋場波嚟打賭！」
突然之間我諗起四位社長嘅賭局，自己都想玩埋一份，雖然如果我贏嘅話Bubble就唯有認命…
健：「好呀，怕你呀？！咪賭囉，賭乜呀？」
我：「欸…我暫時又未諗到。」兩條仔，有乜好賭…
健：「求祈去食間放題囉，或者你公司任嗌。」
我：「唔好，咁樣太無聊，我想諗啲刺激啲嘅嘢。」例如輸咗要胸襲QQ，以換嚟一死？！
健：「想點刺激呀，講明先，我唔玩危險嘢。」
我：「咁又唔會…不過我未諗到。」
健：「玩嘢咩，又係你話賭，賭注又諗唔到。」
我：「欸…到比賽前先算啦，希望對到啦，到時我會諗啲好刺激嘅嘢嚟賭，唔好反悔呀！」




健：「怕你有牙咩，到時你唔好唔認數就真！」
我：「無端端咁有鬥志，唔通你社長餵咗春藥畀你食？」聽聞我社長話餵個小功畀我。
健：「點會吖…不過佢搵得我幫手，都想做返少少成績出嚟嘅，上次長跑慢你一名…實在係…唯有自認技不如人，今次我一定會全力以赴。」
我：「你上次跑到死咁款重唔夠全力以赴咩，小心為咗幫你個社長虛脫而死，變成全力以赴黃泉。」
健：「唔知…Bubble會唔會抱住我條屍嚟喊呢。」
我：「嘩，你諗啲嘢咁變態嘅？！」
健：「講啫，如果我真係為咗佢出賽戰死沙場，佢應該會好內疚，可以死喺佢懷抱入面都唔錯。」
我：「其實…你有無諗過你好適合做兵或者奴？勸你唔好諗太多，你唔係三杉淳或者久保嘉晴。」
健：「乜喎，幻想下犯法咩…如果佢可以私人同我打下氣，或者贏咗嘅話有得抱抱都唔錯，畢竟…我都係見佢師姐先決定幫下佢。」
我：「真係腐敗，好彩我社長係仔嚟啫。」




健：「唔好話我話，你咪又係睇喺女神份上先幫佢，雖然我覺得瘟神點都有辦法氹得郁你。」
我：「咪咁多廢話啦！跑返十個圈先！」
健：「喂！等埋呀…」
然之後，我哋就按照返自己嘅位置，練下盤球，攔截，迫搶傳球，幫佢挑戰下抝腰底線斬中咁；而我嘅工作就比較簡單，用盡方法搶走佢粒波，再傳返去畀前面嘅隊友。
到咗差唔多十二點，我哋收工坐喺側邊抖。
我：「呀，差啲唔記得，Q…uromi託我畀你。」