為了實現媽媽遺願，我成為了女兒國唐僧: 739

呢個當然係指相對上而言，以前EX喺我屋企，有幾可會著褲，一返到去就攞條腸仔出嚟畀佢哋玩…
健：『係咪咁呀，以前你搵我我都食完飯就落返嚟啦，而家有女神喺屋企就唔理我？』
我：『講笑啫，我換衫喇，樓下等啦。』
我：「Queenie，我想抖下，阿健條…友，話溫書悶得滯想落去郁下。」
Q：「你咪落去囉，我又無綁住你喺屋企嘅，唔使我落埋去㗎？」
我：「當然唔使啦，佢邊敢。」
Q：「夜鼆鼆，你哋兩個去搞基呀？」
我：「唔好講笑，我重直過夕樹舞子。」
Q：「呀，你幫我攞呢個畀佢啦，同佢講係Kuromi畀佢嘅。」係一個正方形嘅Kuromi閃閃貼紙。
我：「做乜鬼無端端…妳又唔係對佢乜嘢…」




Q：「係無乜嘢，但我鍾意令到男仔開心，費事佢唔記得咗我啦，我都唔想Kuromi消失。」
我：「咁妳喺課室自己畀佢都得啦…」
Q：「唔得，咁樣唔啱規矩，麻煩晒你嘞。」
有時…我都唔係好明青春期嘅女仔喺度諗緊乜；男仔就簡單得多，就係想撲上去自己心儀嘅女仔上面，先進入，前後移動，再射出。
落去郁下都好，日日身貼身坐喺性感嘅QQ隔籬，真係忍到人都癲，隨時會唔小心做咗啲過份嘅舉動出嚟，到時就無得返轉頭。
我：「嘩，你咁認真，攞埋個波落嚟？」
喺球場上面，得返我哋兩個人，可能因為考試季節嘅關係，其他波友好似散得早咗。
健：「順便啫，橫掂之後都要比賽。」
我：「係咩，咁你重搵我落嚟練？我係你嘅敵人嚟，到時唔會讓你㗎喎。」
健：「講呢啲…放心，到時我一定會射穿你嘅防線，通埋你坑渠。」佢係側翼，我係自由後衛，九成會撞到正，除非我哋咁好彩對唔上啦。




我：「係咪為咗個社，兄弟都無情講先？」
健：「關乜嘢事，我只係想講我唔會輸比你。」
我：「係？你連條筋都唔夠我軟啦…」
我隨即放隻腳上球場邊嘅欄桿上面拉筋熱身。
健：「唓，又唔係做體操，唔一定筋軟就贏。」
我：「但係講跑，你都好似唔夠我快同好氣喎。」
健：「咁係球場上都重需要技術同團體合作。」
我：「話時話，我今次數學測驗都高你幾分。」
健：「唓，你出cheat嘅，如果唔係你屋企有個女學霸喺度教你，你又點會有進步，而且其他大部份科我都係好過你。」