thriXt Qantasy 純文字安眠之作 (New: - U2K - 一直上架): 735

『我前妻…每逢星期六日就會去全港各處嘅活動追星，我已經好耐無食過一餐正經嘅住家飯，只求佢追完function之後可以打俾我約我出嚟食飯，而唔係同佢啲襟姐妹一齊研究有乜戰利品…』
睇嚟，係前夫苦水群啲貼文嚟喎…
『MIRROR演唱會，頭排連位兩張，一口價每張16800，手快有手慢無，另大量收飛，3000至8000不等，有意請PM…』
Well，呢個世界果然係乜都可以用錢解決…
『A：哎吔！我終於抽到鏡仔卡團閃！
B：好難抽喎！咁妳都抽到，我食咗廿餐都無T__T
A：SORRY，我買咗七十幾個餐先有！！
B：吓，先開咗兩個禮拜，點食咁多？
A：一日食兩餐，屋企人都食，食咗啲雞咪算囉，啲薯條攞返學校，睇下有無仔想食。
B：咁樣會唔會唔係幾好？




A：有乜所謂，七十幾個餐先二千五到，團閃已經炒到千五，計埋白卡我有賺添，等於啲食物唔使錢，食唔食都罷啦。』
啲題目…連文字對話都可以攞嚟做資料，乜咁in嘅，係咪Miss Tang自己出㗎，但睇落又唔太似。
崇拜偶像衰三代！崇拜女神衰三十三代！喺右邊嘅再加多三代！總之，沉迷追星影響學業，浪費金錢時間，應該點都走唔甩，只不過…我唔知點樣先可以講足幾分鐘，而且要喺QQ面前講，不如我都係睇佢表演算。
W：「我哋係咪應該謦下陣間點講好？」
我：「可以嘅，但我無乜idea，我又唔追星。」
W：「咁你會持正方定係反方。」
我：「都係反㗎啦，佢都寫晒出嚟，不務正業，嘥錢嘥時間，對社會做成不良風氣。」
W：「我諗應該無乜人會做正方掛，就算自己鍾意追星都好，實俾人打死。」
我望住前面嘅細龜，佢正正就係沉迷偶像嘅人版，只不過佢唔係追香港偶像，而且佢亦都嘥咗好多時間同金錢喺呢件事上面。
我：「係掛…都唔知點講，希望講到十句八句。」




「第七組，到你哋喇。」
五分鐘真係話咁快就過咗去，我哋四個亦都離開座位，行落去語言資訊科技室，都唔明Miss Tang做乜要咁認真，明明只係練習但就攪到我哋鬼死咁緊張。
鄧：「好…到你哋嘞，自己抽張號碼卡排先後次序，然後就可以開始講，首輪每人一分鐘，之後小組討論六分鐘，唔一定要用晒，呢度有秒錶睇。」
正當我伸手想抽卡嘅時候…
我：「Miss，其實抽先好定係抽後好？」
鄧：「係咪玩嘢呀，而家先嚟問我…」
我：「咁…我想知道抽完之後應該開心定唔開心？」