為了實現媽媽遺願，我成為了女兒國唐僧: 736

鄧：「抽先就可以將自己原本準備好嘅嘢講晒出嚟，唔怕句句都好似抄人哋拾人牙慧咁，而抽後就可以即時融會其他人啱啱講嘅嘢，有多啲材料可以加以演繹，甚至根據其他人嘅立場而調整自己嘅方向，各有各好。」
我：「乜嘢叫做『十人牙餵』?」
我唔係想攪事，只不過係從來未聽過呢四隻字，好似好奇怪，諗落有啲變態嘅畫面出咗嚟。
Miss Tang摸住自己額頭一副想死嘅樣。
Q：「拾人牙慧即係將人哋把口講出嚟嘅智慧執嚟自己用，人講乜自己就跟住講乜…」
哦，原來即係跟尾狗，小學時最鍾意咁話人…
W：「多謝Queenie解釋，我都未聽過。」
鄧：「好喇，快啲抽卡，無乜時間剩㗎咋。」
先後次序係，Wendy，細龜，我，Queenie。
W：「我認為學生喺求學時期係唔應該追星嘅，因為明顯地追星呢個活動係會令我哋分心，影響學習，而且重會浪費大量金錢同時間，喺題目資料度就講過，連大人都會因為追星而影響家庭關係，何況係無定力嘅年青人呢？而且睇得出追星呢個活動會洐生出大量消費，例如去睇演唱會，對無收入能力嘅學生容易引致各種問題…」




都幾正路，但啲資料俾佢講晒我重講乜。
龜：「我就覺得…關於追星呢個問題，唔係應唔應該，而係我哋嘅權利，每一樣嘢都有好有唔好，如果一樣嘢有不良影響就要禁嘅話，咁全部學生都唔應該打機，香港唔應該賣快餐食物同汽水，甚至學生唔應該犧牲讀書時間嚟運動，如果咁嘅話香港重會唔會有職業運動員？我有自己鍾意嘅偶像，就係日本嘅女團乃木坂46，喺呢件事上面我搵到自己嘅快樂，所以我哋應該尊重每一個人嘅選擇，只要件事係合法同唔傷害他人…」
不得了，咁激進嘅，粉絲嘅威力實在不容小覷…
好，到我，唔同你哋講我講咗乜，我怕醜，吹咩？
Q：「對於呢個問題，我認為唔應該用一刀切嘅方式嚟下定論，咁樣實在太過武斷，首先，如果我哋假設咗追星嘅行為會帶嚟荒廢學業，浪費金錢時間呢啲後果，咁其實已經扼殺咗大部份嘅討論空間，我相信呢啲壞影響係會出現喺一啲沉迷偶像嘅極端狂熱分子之中，但絕對唔係所有人，一件事情嘅好壞往往係取決於當事人嘅心態同行為，只要加以平衡，結果係咪咁差其實值得斟酌…」