為了實現媽媽遺願，我成為了女兒國唐僧: 706

Q：「咁講啫，我只係合理地有要求。」
我：「男仔嘅嘢，食開燒鵝髀，間唔中都鍾意咬下蔗嘅，偷腥最緊要新鮮。」
Q：「都唔會乜都食得落掛？」
我：「好難講，有啲女仔樣麻麻，但可能有身材，可能識氹人，可能服務好，唔知你男友口味嘞。」
但你問我，我係日日望住隻燒鵝，但連蔗都無得咬嗰個；正所謂有咁耐風流，有咁耐折墮。
Q：「希望唔會啦，就算有都唔好俾我知。」
我：「如果真係發生…妳係咪會好唔開心？」
Q：「唔知呀，如果好靚女都還好嘅，否則…唉，早知唔咁早畀佢，總覺得佢會遲早厭。」
我：「但如果要佢死忍，去到最後可能都係偷。」
Q：「哼，總之你哋啲男仔都係無個好。」




關我乜事喎，大小姐…陣間我重要返工養妳…
星期六，QQ拍拖日，就這樣略過。
星期日，QQ行街日，正當我想略過…
我：「喂，Queenie妳搵我，無嘢吖嘛？」
雖然我哋一齊住，但打電話嘅機會唔係咁多，每次見到佢嘅來電顯示我都會莫名咁開心；或者，可能因為打電話係出於佢嘅主動，而同我一齊住就只係因為生活狀況。
Q：「無嘢呀，你食咗夜晚未，定係煮緊？」
我：「未呀，煩緊整乜嘢食好，妳係咪一齊呀，我等埋妳返嚟先食啦。」
Q：「咁就啱嘞，你唔使整嘢食喇，我經過旺角一田，呢度啲嘢食開始特價，你有無嘢想食？」
我：「無特別喎，我都係睇邊樣嘢平就食乜。」
Q：「有豬扒同海鮮焗飯，都係三十蚊。」




我：「欸…三十就嘛嘛，大家樂貴少少大兜過佢好多又好味好多，個焗海鮮就更加搵笨…」
Q：「雙餸飯廿五蚊啱唔啱？」
我：「就呢個啦，有乜嘢餸揀？」
Q：「咖哩薯仔雞翼，咕嚕肉，翠玉瓜排骨，魚香茄子，蘿白魚鬆。」
我：「咕嚕肉同魚香茄子啦。」
Q：「燒雞髀三十五蚊兩隻啱唔啱呀？」
我：「都OK，我記得佢啲雞髀幾大隻下，留嚟聽日做餸啦，妳想食就買。」
Q：「嗯，咁你等我返嚟啦，bye bye。」
明明…我哋謦電話就同兩公婆無乜分別，點解妳要有男朋友喎，我又唔一定要衰十一先開心嘅，就算只係可以同妳玩其他嘢都已經心滿意足。
雖然，我襯佢唔起又係不爭嘅事實。




過咗半個鐘到佢就返到嚟，手上面拎住一個白色大膠袋，我即刻接過嚟將啲食物擺上枱；另外重有燒雞髀，灣仔碼頭煎餃，半價嘅就過期Al Fresco雞肉腸，通通俾我塞晒入去個雪櫃度。
我食雙餸飯，QQ買咗盒布包壽司畀自己，另外重有我之前烚定嘅一碟蠔油西生菜。
Q：「盒雙餸飯O唔OK？」