為了實現媽媽遺願，我成為了女兒國唐僧: 705

我：「最好你哋壓住對面嚟打，我波都唔使掂嗰隻，等我可以同個龍門喺度玩猜皇帝。」
瘟：「唔好玩啦，就算十一人都唔得啦。」
睇佢個樣好似想擺312陣式，通常翼衛都會想搶前助攻，如果一漏嘅話就已經搵著我嚟搞…是但啦，我都係嚟玩下啫，唔會負任何責任㗎。
出完身汗，返到屋企，要煮嘢畀QQ食，然後又要返工，忙死，唔知會唔會有人幫我做功課呢？
Q：「點呀，入唔入到波？」
我：「無呀，我喺後面解圍攔截，無乜射門機會。」
Q：「咁可惜，重諗住你入到波就畀你揸返下。」
我：「咋？起碼都要射返啲嘢入去慶祝先係。」
Q：「就算畀你你都唔敢啦，嗱，睇下！」
我：「乜嚟㗎？」我望住佢電話屏幕不明所以。




Q：「直播嘅收入呀，嘻嘻！」
都幾好喎，先玩咗三個禮拜就已經有千二蚊。
我：「恭喜晒，妳可以有錢使喇。」
Q：「嗯，聽日同男朋友拍拖，可以買份小禮物畀佢嘞，後日約咗班八婆行街兼溫書又可以買下嘢…喂…做乜咁望我喎，唔會亂使㗎，我會留返啲…」
我：「唔係，啲錢妳搵返嚟，妳隨便使啦，我會負責返妳啲食飯錢。」
Q：「其實…有乜好使吖，得嗰少少錢。」
我：「對唔住，我嘅能力…只係夠妳有飽飯食。」
Q：「關你乜事喎，你對我已經好好，咁有錢有有錢過，窮有窮過啫，起碼而家過得開心，又無乜嘢煩，唔使周圍去，可以靜靜地自己溫書。」
我：「妳真係適應到就好。」
Q：「本來無一物，何處惹塵埃…係呢，你覺得買乜畀男朋友會比較好。」




我：「凸點condom。」我死魚眼答佢。
Q：「唔要呢啲！本身…又唔係無。」
我真係俾呢個死靚妹吹脹…妳買嘢畀條仔又關我乜事喎，享受嘅又唔係我，最好買個炸彈畀佢炸到佢一鑊甘，或者買條貞操底褲等佢體驗下有得睇無得食嘅滋味。
我：「遥控震蛋一粒。」
Q：「都話唔要呢啲咯，我人設唔係咁。」
我：「似妳樣嘅AV女優寫真集一本。」
Q：「無呀，全部都唔似。」
我：「出軌原諒兌換券。」我扮哆啦A夢把聲。
Q：「你個腦可唔可以諗啲正常少少嘅嘢？」
我：「DSE歷年題解大全集。」




Q：「…」
我：「做乜喎，男仔來來去去都係諗呢啲。」
Q：「你係咪覺得…佢會想出軌？」
我：「妳同問我貓想唔想食魚有乜分別？」
其實我都唔知點解貓鍾意食魚同捉老鼠…
（https://nootspets.com/blogs/news/why-do-cats-like-fish/）適合DSE level之延伸閱讀。
Q：「我喺度諗，咁佢食開我，如果要偷食都要搵返個咁上下質素掛，但靚嘅女仔通常都會比較麻煩，無咁易溝，咁唔係偷食嘅機會會低啲咩？」
我：「原來妳都知妳係麻煩嘅女仔…」