為了實現媽媽遺願，我成為了女兒國唐僧: 704

健：「黐線㗎！我唔鬼識你呀。」
我：「你扮唔識我信唔信我行埋去同佢講你暗戀佢吖嗱。」我帶住變態嘅笑容同佢講。
健：「你試下吖，打鑊你甘㗎！」
我：「咁試下都好喎，睇下你係咪真係打到鑊我甘。」雖然我天生愛好和平…
健：「唔好玩啦，反面㗎…」
我：「唓，你對住Kuromi都敢表白啦，怕乜？」
健：「點同…我係真心鍾意Kuromi，而且係佢玩我在先，錯嘅又唔係我…」
吓？即係點？同女仔表白會係一種錯？定明知表白會失敗都去做就係一種錯？而如果個女仔有錯在先，你就可以亂嚟都唔會錯？
真心唔明，咁係咪只要個女仔flirt你兩嘢，就可以推佢落床為所慾為，再賴佢有錯在先？
好囉，咁我次次都錯有錯著，滿意未…




健：「其實Vincent係咪好受歡迎？」
我：「欸…還好吧，個樣幾好？身型幾fit？聽聞有家底囉，讀書都好似頭嗰批嚟，我諗…女仔會覺得黐埋去唔會蝕底嗰隻囉，我覺得就…麻麻地吸引，都係得把口嗰種。」
問心，我係女仔咁細個都係想玩啫，個樣企理，正常人，有啲錢，可能蝕底少少，但會有回報，都無壞嘅，俾靚仔呃都好過俾爛仔玩，又唔係過人世，輸少當贏啦。但係QQ對佢就好似無乜興奮嘅感覺，可能影響到我都認為佢無乜特別。
健：「佢先大我哋一年，好似乜都做得好好咁…」
大佬，佢大我幾個月咋，咁係咪我有問題…
豬：「YO，乜兩位唔係嚟踢波嘅咩，做乜坐喺度？」無端端身後嚟咗一頭龐然大物。
健：「未到我個社嘛，下場就到我。」
我：「我喺度偷懶，吞泡，蛇王…喂，咁你又係嚟做乜㗎？」
豬：「返屋企經過啫，見到咁多同學咪順便入嚟睇下，順便昅下…Bubble對大波波。」
佢一路四圍望一路講。




我：「係嘅，得佢對大波波先可以襯得返你嘅體形，一樣可以用Pi嚟計算volume，細胞組成結構都係類似，但從社會學角度嚟講就只有一邊係美化市容…」
豬：「講乜㞗嘢呀你！」
我：「無講乜，不如下場落嚟同我一齊踢吖。」
豬：「咪玩啦，足球又唔係我強項。」
我：「點會呢，叫你落嚟做波咋嘛。」
結果，又係一場打鬧…其實，我只想和你無所事事兼生非，呢啲先係中學校園生活。
過咗N耐，終於等到我落場，已經喺看台玩到差啲唔記得咗自己嚟做乜。
瘟：「阿爽，班form 5爭住做前鋒，而且佢哋又有校隊，咁我係社長無理由唔喺中間嘅…你跑得咁快，如果唔介意嘅話不如做自由後中衛？」
我：「無所謂，我都唔鍾意出風頭嘅。」
瘟：「咁就好，最怕你唔開心。」