為了實現媽媽遺願，我成為了女兒國唐僧: 674

我：「喂！妳有無攪錯呀！點解可以咁專業？」
Q：「你理得我吖，本身我就係一個專業嘅GF。」
健：「Kuromi，妳重嫌玩得我唔夠咩…」
Q：「呵，唔要就算，幾多男仔恨都恨唔到。」
健：「妳…有無咁等錢使呀？」
Q：「咁又無，不過多少少零用錢都係好事嚟。」
健：「五百蚊太貴喇，如果平少少…都係唔得，對住妳我會唔知點好，怕咗妳。」
我：「係囉，畀多少少就得，乜都包晒，直接幫你變成大人，唔使幫襯啲奸商。」
然之後QQ狠狠咁望住我，係吖嘛，抱抱都唔包實在係太過份，同純畀錢請妳玩有乜分別？
健：「都話唔係要嗰啲嘢咯，我係想要…戀愛。」




我：「咪話咗你一啲都唔現實，個女仔同你三唔識七，為咗賺錢咋，要佢同你做愛應該易過戀愛。」
健：「喂，咪咁直接啦，有女仔喺度㗎…」
Q：「做愛咋嘛，有乜特別？如果呢個世界無女仔就做唔到愛，女仔唔可以知㗎咩？」
健：「呀！救命呀…我真係服咗你哋兩個。」
Q：「阿爽講得啱，呢啲嘢係有錢都買唔到㗎，你都係慢慢畀心機識女仔吧啦。」
健：「唉，我已經放棄，越諗越傷心。」
Q：「嗱，最多咁嘞，如果我身邊有啲乜嘢女仔…發晒姣好需要咁，我睇下介唔介紹到畀你啦。」
健：「吓！真㗎？Queenie女神大人？」
Q：「喂，你唔好咁興奮呀…呢啲嘢邊話得埋，真係有先算啦，同埋啲好有本錢嘅女仔，我都無可能介紹你畀佢哋識㗎喇。」
健：「唔緊要呀，有已經好好！普通女仔就得。」




Q：「又或者，如果你有目標嘅話，我都可以睇下點出手幫下你嘅，但唔好係校內同學，喺學校入面我會綁手綁腳…」
健：「多謝女神嘅大恩大德…」
Q：「講明先呀！我唔會幫你呃蝦條㗎。」
健：「其實…我有個問題想問好耐…乜叫呃蝦條？」
我：「哈哈哈哈哈…哈。」
Q：「…，你唔識就最好，唔好Google添呀！」
健：「搞乜鬼，你兩個都神神化化咁。」
飽餐一頓，問題都得以解決，我哋就各自各返屋企；去到平台可能無乜人，QQ又拖住咗我隻手；有時我會覺得，佢想拖住手係出於習慣，因為身邊有個男仔拖住行會舒服啲；又或者係出於禮貌，始終我哋係互相扶持共同生活嘅家人，平排行又要保持距離總係有啲怪。
好快就返到屋企。
我：「嗱，五百蚊家用呀。」




Q：「做乜…無端端畀五百蚊我呀？」