為了實現媽媽遺願，我成為了女兒國唐僧: 675

我：「PTGF服務，包拖手，不足一個鐘當一個…」
Q：「妳當我係乜呀？！」佢一嘢打落我心口度。
我：「又係妳自己咁講嘅…」
Q：「咁我…日日上埋個客屋企添呀，陪足你咁耐，你可以申請破產都似。」
我：「其實分別不大，識咗妳之後我已經變成無產階級，每日為生活打拼，為女神服務。」
Q：「咁你重講乜嘢家用吖，拎嚟啦！」
結果佢都係收咗我張五百蚊。自從有妳喺呢間屋，我已經一無所缺，重講乜資產吖。
到咗第二日嘅lunch time，阿康漏咗功課喺屋企要仆返去搦順便食飯，所以就得返我同阿健。
健：「喺學校真係估唔到你兩個會咁，剩係以為你哋純粹好謦啲啫。」
我：「估到重得了嘅？你唔好咁大聲講添呀。」




健：「放心啦，我都知道事情嘅嚴重性嘅…不過你同個個女仔都可以咁好謦，實在唔覺得奇怪。」
我：「邊係，我都無乜特別走去識女仔，只不過係因為坐喺隔籬，而唔講嘢嘅話我會死。」
健：「係你呢排唔走去識啫，我終於明你點解唔溝女，以前你會成日出街撩女仔。」
我：「唔係嘅，我同Queenie只係一齊住。」
健：「咁都好夠啦，而且有佢喺屋企，你重邊有空間溝女…」又串我係為咗同女扑嘢…
我：「都唔太關事，重有好多原因嘅。」
健：「你唔係真係諗住同我講你要努力讀書呀？」
我：「認真，呢個好明顯係原因之一。」
健：「真係信你一成…唉，Queenie嘅背影…其實真係好靚，重靚過Facebook張相好多。」
廢話，成個真人戙喺前面咁有立體感喎；而且嗰張相應該係大半年前影，而家佢嘅身體豐滿咗啲個pat pat更加靚，琴日重要著住套勁有少女心嘅薰衣草色綑黑邊內衣，即係類似Kuromi公仔隻色咁，佢唔色心動就奇啦。




我：「鍾意人哋咪去追囉，或者做佢隻兵都得，話唔定佢會定期派兵糧畀你添。」
健：「點解你成日都可以下巴輕輕…Queenie呢啲女仔太高level，睇係好好睇，真係相處起上嚟，問心我完全搞唔掂，又唔係你。」
我：「無㗎喎，做兵都係講究死纏爛打，佢每年都唔知要趕走幾多條仔，但而家話肯同你做朋友，我諗點都實有少少機會。」
健：「咪傻啦，唔同你爭，你好好努力。」
我：「你就咪傻，佢住喺我度，我做乜要做兵？」
健：「我而家明你點解要返工搵錢。」
我：「乜喎，咁佢又未做得嘢住…我又咁啱好彩有人請，當係幫補下佢生活啫，我都唔想睇住佢受苦，況且…佢都話第時會還返畀我。」
健：「點還呀？幾時還，還啲乜…」
我：「你咁嘅衰樣望住我做乜？！同佢都一齊住咗咁耐，唔會諗嗰啲嘢㗎喇，遲啲先算啦。」
健：「鍾意人就鍾意人啦，扮清高。」




我：「送返你嗰句畀你，佢太高高在上，有得睇下就好…不過，佢好快識搵錢㗎喇，到時就唔使欠我咁多。」
健：「佢可以點搵錢呀，點解你哋可以咁多搞作？」當然，我死都唔會同佢講QQ玩直播。
正常生活，快播去到星期日。
我：「睇下！順豐啲叔叔真係好鬼死勤力，星期日都肯派貨。」我抽住一個草綠色纖維袋講。