為了實現媽媽遺願，我成為了女兒國唐僧: 670

Q：「做乜講到Kuromi好似會食人咁，明明我就好好人，喂，你唔係要我同佢兩個人食呀，如果俾人見到我又水洗都唔清，我已經有排煩。」
我：「咁如果多啲仔同妳一齊食就洗得清咩？」
Q：「呵呵，我咪話有兩個傻仔嚟朝聖囉。」
服咗佢，係佢先可以做女神做得咁入戲，唔收返多啲兵實在係暴殄天物。
就係咁，我哋三隻柴娃娃落咗去大家樂食晚飯，希望我唔會撞到啲EX啦，雖然其實無問題，但我唔想節外生枝；如果Angel就另計，因為我實在係太掛住佢，唔係話好想要同佢做啲乜嗰隻，而係真係想交換返個聯絡。
本身我就話無端端請乜鬼嘅，但個傻仔係都要堅持，咁我唯有卻之不恭，欲拒還迎啦；但我就唔會咁厚面皮同佢兩個一齊鋸扒嘞，所以我食咖喱牛三寶飯，因為呢樣嘢都唔係成日有。
坐位又係另一個問題嚟，以我同QQ關係一早就拍埋牆單邊挨住坐，但礙於阿健喺度嘅關係，我哋讓咗QQ一個人坐卡位拍牆中間嘅位置，兩條仔就打對面平排坐。
阿健亦都好醒目，見到個扒餐出嚟就即刻飛奔出去幫QQ攞過嚟，我心諗你都幾有資格做兵吖，平時就唔好喺度扮啦。
Q：「喂！咪住！唔好推過嚟。」佢截停咗阿健。
健：「做…做乜呀？」佢個樣一面不解。




Q：「你咁樣倒啲汁落去會彈到我成面成身都係㗎，你拉返去你嗰邊先。」
健：「唔好意思，對唔住。」
然後QQ攞咗張紙巾出嚟攤開拉起。
Q：「嗱，你而家可以倒啲汁落去喇。」
跟住佢小心翼翼將啲汁均勻咁淋落QQ塊扒上面，似乎好驚乜咗又會俾女神鬧咁。
鐵板上隨即發出滋呢渣嗱嘅聲，一粒粒汁液同油脂彈咗上QQ塊紙巾上面。
Q：「嗱，而家幫我揸返住張紙巾啦。」
健：「對唔住，我未試過同女仔食飯。」
Q：「嗯，慢慢練習下就會識㗎喇。」
睇住QQ教仔咁教，我都無眼睇；係呢，佢平時對我都好似無咁多意見，係因為覺得我無問題？定係同我玩得太埋所以不拘小節？