為了實現媽媽遺願，我成為了女兒國唐僧: 671

見阿健咁辛苦，我就出去幫佢攞埋佢份鐵板，放喺隔籬張吉枱上面咋個你死我活，正所謂各家自掃門前雪，賴理別桌成枱油嘛…講係咁講，各位小朋友出街食飯嗰陣最好企理啲，因為小弟都係飲食業清理界嘅其中一員…
健：「有個女仔friend喺身邊真係好。」佢望住我講。
我：「係咩，自己識個囉。」我一邊啜條牛筋入口…
Q：「咪咁灰啦，我又無話唔同你做朋友。」
健：「但都唔同，又唔係自己識返嚟嘅…就算，妳可以一直保持Kuromi嘅身份，都唔會…應該…無諗住當我係好朋友。」
Q：「唔好咁講啦，其實…你都幾得意嘅。」
健：「係因為睇住我嚟玩所以覺得得意？」
Q：「嗱，我唔知你哋男仔點諗，你覺得我衰人又好，港女又好，但我就覺得呢，就算一個女仔肯同你玩，都總好過佢絕對唔理你嘅。」
健：「唉，又真係咁…不過妳係女神嚟，要乜有乜，有咁嘅睇法係正常。」
Q：「我講明先呀，我真係唔係鍾意玩男仔㗎，只係你盲摏摏走過嚟，纏住我唔放，我又無辦法叫你走先咁㗎咋。」




健：「其實我係咪好煩？」
Q：「又未至於嘅…不過，你都無其他辦法。」
講到尾，做人太天真，係唔會有任何結果。
我：「我諗，你都係無謂再咁沉迷落一個女仔上面，無乜意思，玩著自己玩到人。」
健：「重好講！識咗你咁耐，有同我講過任何有建設嘅嘢咩，溝女你就叻。」
我：「乜無呀，我咪講過想識女仔咪去識，同人哋講多啲嘢，你就剩係識話好似好怪，又話驚人哋唔鍾意自己，諗唔到講乜好，咁我又可以點喎，唔通捉個女仔放喺你面前要佢識你咩，我叫你唔好對Kuromi咁上心，又唔見你聽我講？」
健：「都係嘅，但我搵唔到方法開始。」
我：「嗱，嗰邊嗰枱有兩位姐姐喺度，你走過去話同我哋玩truth or dare輸咗，問佢攞個IG嚟follow下囉。」
健：「黐線㗎咩，三唔識七失驚無神攪人哋！」
我：「咁如果我過去攞到嘅話，你包我食一個月大家樂lunch好唔好，最多我每次只嗌一份。」




健：「唔好…我實輸都似。」
Q：「其實交叉仔講得啱㗎，識一個女仔，最重要係認識佢，嘗試下同佢溝通，睇下相唔相處到，無端端鍾意人哋好無意思，個女仔會覺得唔知你諗緊啲乜，然後怕咗你。」