為了實現媽媽遺願，我成為了女兒國唐僧: 668

Q：「哼，佢敢亂嚟我實踢爛佢下面，等佢抱憾終生…喂，做乜唔講嘢？吖，重要自己喺度一個人玩亂鬥！」
我：「你哋講緊數我點好意思騷擾呢…啱啱見到有活動，打多兩場就有免費skin。」
Q：「可唔可以幫我打埋呀？睇怕以後都唔會有人送skin畀我喇。」
健：「妳唔係重想打劫我呀？」
Q：「乜打劫呀？我都無話要，明明係你自己送得鬼死咁開心。」弊在妳都無話唔要吖。
健：「其實妳嘅話…搵個香港工會，join下啲網聚，應該想要乜就有乜啦。」
Q：「吖，你當我係乜呀，你估咁易有得同我一齊打機㗎，而且我唔多想見到啲煲機毒撚囉。」
健：「我係咪就係妳口中嘅毒撚…」
Q：「又未至於嘅，但就應該係你去下呢啲網聚，話唔定可以識到啲合眼緣嘅女仔呢。」
健：「就算識到，我都爭唔贏其他仔啦，我唔想再攞苦嚟受。」




Q：「哈，講到同我打機好陰功咁。」
健：「唔會…唔會…開心死，開心到…死咗。」
Q：「咁就抵送skin畀我啦，嘻嘻。」
健：「唔好啦，重送乜鬼skin喎…妳有咁鍾意玩咩？而家都咁…不過…雖然唔知妳屋企乜嘢情況，但我都可以請妳食下飯嘅。」
Q：「啊，想約我食飯呀？」
健：「唔敢，多謝妳陪打機，同埋當幫下妳囉。」
Q：「要參加助養女神計劃嗎？」
健：「唔…唔喇，唔係話我唔鍾意妳…只不過呢啲…唔係太啱我。」
Q：「是但啦，鍾意點諗係你嘅自由，有飯食我都會食嘅，咁不如就而家咯，我都已經肚餓。」
搞完一大輪其實已經就嚟七點，平時呢個鐘數都差唔多開飯。




健：「可以呀，我打電話同阿媽講先。」
然之後佢就又搵我過橋，話我捉住佢喺青年中心一齊玩，不過今次加埋讀書，正一大話精。
雖然覺得要報告阿媽好細路仔，但我都想做下。
健：「OK喇，不過唔好諗住有乜貴嘢食，如果妳唔介意嘅話，不如去大家樂鋸扒，好唔好？」
Q：「乜都得呀，就算係M記都照殺你！」
健：「吓…真係㗎，咁又唔會嘅。」
我：「妳不如將以上對話原封不動同你條仔講多次？」我唔想再聽到乜cafe，壽司拉麪，risotto…
Q：「唔出聲無人話你啞㗎！無辦法啦…而家女神落難，有乜就要食乜…」佢轉個頭對住阿健講。
健：「咁希望妳適應到。」
Q：「OK嘅，馬死落地行，等我換返件衫先。」




當我個神志重喺深淵亂鬥緊嘅時候，我一個唔為意；嘩屌！右女神妳搞乜鬼呀，平時就話咁換衫啫，而家阿健喺度㗎，妳係咪唔記得咗？！
阿健個傻仔當堂呆咗喺度。
佢望住QQ個玉背，一副唔知點咁嘅樣，然後又望住我，好似唔小心做咗衰嘢驚俾人拉咁；至於我…真係唔關我事，我從來都無要求過QQ喺我面前換衫，只係佢嫌喺廁所換衫極唔方便…咁又係嘅，女仔襯衫隨時要試五六件先收手，呢度係自己屋企無理由要屈喺個試身室度。