為了實現媽媽遺願，我成為了女兒國唐僧: 667

健：「我都…唔知，只係見到佢背影幅相…」
Q：「乜我有咁正咩？」其實…以我所知，一般靚女都唔會好意思咁樣問人，但QQ嘅情況實在係無得輸，所以先敢厚住面皮轆大對眼質問啲男仔。
健：「妳…自己都知…無謂要我當住面讚妳一次…」
Q：「其實你可以繼續鍾意我㗎！」我聽到佢呢句差唔多嚇到噴飯，乜原來女神同男仔相處可以係咁㗎，點解我日日同佢住都唔知嘅？
健：「Queenie…唔好再玩我啦，妳本身有男朋友，而家重要同呢隻嘢住埋一齊，我點鍾意妳…」
Q：「無所謂㗎，學校大把男仔都話鍾意我㗎啦，鍾意咋嘛，你哋都可以鍾意好多女仔㗎啦。」
健：「唔好刺激我啦…無咗Kuromi已經夠傷心。」
Q：「發現咗Kuromi原來係我，就唔肯同我玩嗱？」
健：「咁又唔係…但成件事都唔同。」
Q：「其實無乜唔同，只係你太多幻想。」




健：「係囉…太多幻想係我錯。」
Q：「如果你唔拆穿我，重可以一直玩落去。」
健：「定一直俾妳玩落去…當我覺得Kuromi係妳時，就知道，我唔會喺Kuromi度得到任何嘢。」
Q：「你已經好努力，起碼Kuromi睇住你上傳說。」
健：「但已經係最後…睇怕暫時都無心機玩住。」
Q：「唔緊要啦，嚟緊專心啲讀書咪幾好。」
健：「嗯，如果有心情嘅話…Queenie，對唔住呀，我頭先…唔應該咁鬧妳。」
Q：「算啦，你嬲我都正常嘅，不過如果你再有機會喺網上面識女仔，真係唔好太興奮喇…」
健：「唔喇，見過鬼怕黑，唔想再上網識人。」
Q：「係呀…都好嘅，如果唔係下次分分鐘識到個Kuromi係男仔嚟，網上真係乜人都有，不過呢，而家輪到我拜託返你，希望你可以好好幫我保守秘密。」




健：「呢層，Kuromi唔會想睇到我傷害妳嘅，但…可唔可以容許我一問，點解妳會住喺阿爽度嘅？」
Q：「因為…我無家可歸囉，就係咁簡單。」
健：「Queenie，妳無屋企返？」
Q：「嗯，我而家係沒有家的女孩，絕對唔係離家出走，亦都唔係貪得意所以嚟玩。」
健：「妳屋企…出咗好大問題？」
Q：「已經過咗去嘅嘢我唔想再講，總之而家生活無問題我就算。」
健：「妳就咁樣同個男仔住埋一齊…」
Q：「有乜問題，雖然都係迫於無奈，你係咪又有地方畀我住吖，我唔介意嚟住下㗎，不過我唔會提供任何服務。」
健：「無可能啦，有邊個好似呢條友咁好彩…唔…係咁啱啫，不過你兩個係乜關係…」
Q：「嗯…大概就係同學加鄰居咁囉。」




做乜…好似連降幾級咁嘅？
健：「真係得㗎？呢條友明明以前…」