為了實現媽媽遺願，我成為了女兒國唐僧: 662

我寧願佢係咁：“仆街仔，到你發咗達唔再係屋邨仔先嚟追我啦，如果唔係發夢嗰陣打多啲飛機。”
Q：「真係麻鬼煩，知咪算囉，係都要攤牌做乜。」
我：「咁即係點？」
Q：「如果你係佢，知道俾我玩緊，你會點？」
我：「我諗…會覺得妳仆街掛…係個賤格嘅死港女，但鬧妳又有乜用，去鵝頸橋打妳小人好過。」
嚟到呢一刻，就算知妳玩緊我，我都甘心。
Q：「乜我真係好仆街咩？」
我：「你問佢囉，我點知佢點諗，我就唔會送skin畀個樣都無嘅女仔，重要愛到要生要死。」
Q：「唉，我去睇下佢點。」
QQ行咗出露台，而我就唔知點好，佢哋嘅事我諗我無能力插手，最安全就係乜都唔講。




過咗一分鐘到QQ行返入嚟。
我：「佢…無乜嘢吖嘛？」
Q：「重喺度輕微咁喊緊，叫我唔好理佢，但就喺度睇緊同Kuromi啲message。」
我：「點解妳好似講到Kuromi係另一個人咁？」
Q：「咁係吖嘛…平時嘅我又點會同佢咁講嘢。」
我都知佢講嘅係事實…女神真係好恐怖，可以隨時cosplay第二個人咁，有啲驚佢精神分裂，都唔知平時對住我嗰個佢又係咪真正嘅佢？
Q：「如果俾佢揸下玩下就可以解決問題，我又唔係好介意呀，可惜唔係。」
我：「乜原來妳真係咁無所謂㗎？」
Q：「掂下又唔會傷害到我心靈嘅，最緊要無人睇到啫，鎂光燈外面眾人嘅目光同嘴舌先係最恐怖嘅嘢。」
我：「但佢想要嘅嘢又唔係淨係摸下女仔。」




Q：「又係你話男仔通常好膚淺，見個女仔靚就會鍾意佢，想擁有佢，然後做好多壞事…就好似你同你嘅前女朋友咁，我講得啱唔啱？」
我：「都過咗去…而且想做壞事，就唔剩止揸下咁簡單，男仔係得一想二，接二連三…」拍埋四仔。
Q：「哼，諗下好，本小姐唔會被威脅到。」
我：「不過如果你男朋友知道咗嘅話…」
Q：「都無辦法，一係佢畀地方我住囉，如果諒解唔到我嘅話就分手，無謂浪費大家時間。」
我：「我諗個死仔講下嘅啫，邊夠膽吖佢。」
Q：「算啦…由得佢先，唔好理佢住。」
我：「吓…呢度我屋企嚟喎，可以點由得佢？」
Q：「我見你露台鎖咗窗花，跳唔到落去，無事。」
我：「原來咁就叫無事…但唔理佢我哋又可以做乜？」




Q：「嚟啦，我哋輕鬆一下先。」QQ攞咗佢部電話出嚟，打開咗傳說對決。
我：「吓，呢個時候妳重有心情玩嘅？」
Q：「咁唔係點，唔通扑暈佢等佢爆唔到我嘅秘密出去？」