為了實現媽媽遺願，我成為了女兒國唐僧: 661

健：「妳想我點喎！嗚嗚…明知…嗚…我係條唔敢嘅廢柴！」條友仔已經崩潰咗，用塊面抱住自己膝頭喺度喊…係嘅，對住QQ，佢的確係條廢柴，一個係極受男仔歡迎識得同人打交道嘅校花，一個就係連主動開口同女仔面對面講嘢都唔敢嘅廢柴。
越係驚輸，你越會輸到一敗塗地，一無所有。
見到佢咁，QQ都無佢咁好氣，坐返喺梳化。
我：「唔好咁啦…有邊個未俾女玩過。」我拍拍佢嘅膊頭，希望佢唔好咁樣衰，喺個女仔面前喊到咁實在係肉酸死。
包括我…但事過境遷，俾人玩只係當時嘅心境，其實大部份嘅情況都係有原因。
健：「唔使你咁好心呀！」佢右手撥開我隻手，然後左手揞面衝咗出去我個露台度。
真係一個麻煩嘅細路…好似小學生扭計咁。
正如婆婆話落樓下買雜果撻畀我食，結果佢因為特價而買咗蛋撻，雖然我因為佢係老人家而唔敢扭佢計，但係嗰種冤屈…可以一直存在喺個心好耐；到大個咗，只要我見唔到雲吞特價，我係絕對唔會買，好在QQ都無乜投訴。
而又…我哋都重係小朋友，只不過生活環境迫到我同QQ大得快啲；至於我哋點解咁快變男人女人就係另一個故事。
Q：「唉，真係無佢符，麻鬼煩…」




我：「都無辦法，要嚟嘅始終都會嚟，如果妳唔拖住佢…話乜吽到暑假先解決佢，可能會好啲。」
Q：「未必，Kuromi係一個問題，但俾佢發現我住咗喺你屋企就係另一個問題。」
我：「點解佢會發現咗㗎…」
Q：「可能係頭先…我見咁晏，無預過有人會發現我，以為兜完路就安全，無留意有無人喺後面跟住我，加埋個死仔…頭先係咁send message嚟，我又費事已讀不回。」
我：「咁我明喇，佢見妳攞起電話再放低，就收到Kuromi嘅message，結果就…」
Q：「結果點都好啦，已經擺喺眼前。」
我：「佢好似好慘咁…」
低能，抵死，自討苦吃，並唔係禁止你覺得慘嘅理由，心境呢樣嘢…好似從來都唔講道理。
所以，我係完全無勇氣向QQ表明心跡，莫講話追。
“阿爽，我知你對我好，但我對你…並唔係…”




“我諗住同你玩下，一齊開心，無諗過你會認真…”
“我…係咪唔小心畀咗錯覺你？對唔住，我知我欠你好多，如果你有乜好想對我做，我唔會怪你，但我諗都只可以係咁。”
“我而家開始識搵錢，你唔使再畀家用我㗎喇。”
“爽，可唔可以當你無講過，同以前一樣就好。”
是但一句，都夠我痛心疾首，肝腸寸斷。
得唔到佢無問題，但以後一齊生活就多咗重隔膜，我唔知點適應，到時就算見到佢裸體內心都只會得個苦字。