為了實現媽媽遺願，我成為了女兒國唐僧: 659

唉，一嚟就咁直接同女神講嘢，怕且佢已經豁咗出去，今勻我實在無眼睇，好大機會…我會失去呢個朋友，因為無論如何我都會企喺QQ嗰邊。
Q：「Well，我搵邊個朋友，上去邊個嘅屋企…睇唔到同你有任何關係喎。」
健：「咁妳係咪Kuromi？」佢斬釘截鐵咁講。
Q：「我諗…我唔知你喺度講緊乜，邊個Kuromi？」
我：「…。」
健：「妳扮嘢？嗰陣…我喺課室打開Kuromi個Facebook，妳當時就喺隔籬，重要搶咗嚟睇。」
Q：「哦，嗰個…我…邊記得咁多人名喎…」
健：「得，妳唔認，咁妳放部電話上枱面，睇下我send message畀Kuromi會唔會彈通知，再睇下有無Facebook同埋傳說，有就開嚟睇下。」
果然，佢係嚟追數嘅，要知道一部電話係女仔最重要嘅私隱嚟，直接話要睇係非常之無禮貌；就算好似我同QQ咁親密，甚至我已經大概知道佢嘅密碼，都唔敢私自掂佢部電話；而又當然，我唔認為會喺入面搵到啲乜對我有用嘅嘢，閃卡嘅話…同我平時睇佢差唔多啫。
Q：「唔需要咁麻煩，我係Kuromi又點，我唔係Kuromi又點？」呢邊嘅氣勢亦都一啲都唔弱，但QQ咁講其實已經間接承認咗自己嘅身份。




健：「我就知道…嗰次妳同埋呀爽一齊斷線已經夠晒奇怪，同埋平時Kuromi把聲…扮得好假。」
Q：「恭喜你偵破大案喎，福爾摩健。」
唔通連QQ都覺得情況無可挽救，重喺度講笑…
健：「點解你要玩我？！K茜旎！」
Q：「我唔認為Kuromi有玩你，佢從來都無同你講過啲乜，係你自己諗埋啲無謂嘢，Kuromi一直無做任何暗示同引導。」到底QQ係咪精神分裂…
健：「妳…好嘢，唔好以為自己牙尖嘴利我唔夠妳講就大晒，道理唔係咁㗎！」
Q：「係呀，我就係唔講道理嘅港女，我諗你平時都係咁諗我㗎啦，你覺得我玩你你咪走囉。」
Mola，Mola，Motorola喇，重可以點掹…
健：「條女係咪喂咗迷湯畀你飲？！點解你可以幫埋佢一齊玩我？」佢開始引用連坐法。
我：「我…其實…亦都無講過啲乜…」




健：「好嘢呀下…一對狗男女，講嘢都同一個口脗。」確實…如果我一早話畀佢聽Kuromi嘅身份就唔會有呢個誤會，但奈何…我首要嘅考慮一定係幫QQ保守秘密。
Q：「如果你係都要怪晒全個世界，會唔會諗下其實自己都有問題先？」救命…一旦QQ寫辯論文或者oral上身，就神仙都難救。
健：「我只係鍾意一個女仔，咁都係我問題？」
Q：「你鍾意一個樣都未見過，而且唔係太show你嘅女仔，唔覺得自己好幼稚嘅咩？」
我隱約聽到，後面重加咗句超低能勁白癡。