為了實現媽媽遺願，我成為了女兒國唐僧: 650

Q：「咁又唔好，如果有人課金我唔排除送個啜卟畀人㗎嘛。」啜卟…我都想要，唔知要課幾多金先有呢？講起上嚟，我同妳都好耐無啜卟過。
我：「重以為妳係完全靜音主播添。」
真諷刺，當其他女仔喺度聲嘶力竭唱歌，講故仔，玩遊戲，調情；妳著少啲布喺度彈琴就有錢收，上天實在係太過唔公平。
Q：「基本上係啦，不過都可能有啲嘢要買，例如電話腳架…補光燈…藍芽keyboard。」
我：「無問題呀，妳寫低我搵日去深水埗幫妳買啦，係嘞…我想講…直播雖然係正當嘅活動嚟，但網上面嘅人…好多都好奇怪嘅，妳要小心啲呀，千祈唔好為咗錢就亂咁…」
Q：「你傻嘅咩，我樣又唔出，連聲都無，又點會出去見佢哋呀，如果要冒呢啲險我使鬼直播咩？」
我：「係就好…」
Q：「不過我有樣嘢煩緊。」
我見佢拎住張黑色卡片，上面有啲燙銀嘅字。
我：「Anson…女僕研究…哈哈哈，乜鬼低B嘢嚟？！」




Q：「無呀…係我做女僕餐廳時識嘅一個人。」
我：「嗯，唔通係妳fans嚟？」
Q：「可以話係掛，但佢應該係女僕都啱嘅…」
我：「佢印埋啲咁無聊嘅低B嘢，有錢仔嚟嘅？」
Q：「我諗都有啲嘅，周身牌子嘢咁。」
我：「妳想叫埋佢嚟課金？」
Q：「我諗緊…但始終喺現實見過面。」
我：「咁…妳都唔會再去做女僕㗎啦，佢又唔會搵到妳，應該無乜嘢嘅。」
Q：「唉，聽日先算啦，我都眼瞓…好彩遮咗大半塊面直播唔使點化妝，沖下個身就瞓得。」
我：「其實妳素顏都咁上鏡，根本唔使化妝。」




Q：「係咩，多謝你嘅稱讚，不過唔會有奬勵。」
睇到佢咁積極，我都好想做返啲嘢。
係喎…我重要幫佢睇性感嘅直播開工衫…
到咗第二日星期六，我哋照常起身就做晒啲功課，食晏飯，再陪佢一齊溫書；Queenie真係好勤力，考完mid term都繼續溫，我喺佢耳濡目染之下都變得…唔敢自己一個人去打機。
我：「我整晚飯喇，妳唔使抖下？」
Q：「都差唔多，聽日去拍拖，我想搞掂晒啲嘢先。」嚟到而家佢已經會好輕鬆平常咁話我知幾時去溫仔，我都習慣晒無乜嘢；聽日星期日，條仔屋企有人，應該就唔會扑嘢。
我：「咁妳聽日重直唔直播？」