為了實現媽媽遺願，我成為了女兒國唐僧: 651

Q：「唔啦，星期日應該無咁多人，我都係為咗搵少少零用錢，得閒先播下，唔想嘥咁多時間。」
我：「咁又係，男朋友都係好重要嘅。」
Q：「嘻嘻，同佢拍一日拖嘅收入，可能同我直播一晚差唔多㗎咋。」
我…唔識評價佢用收入多與少嚟形容同男朋友拍拖，但佢講得啱嘅，食一餐半到兩餐，可能加杯四季春，買少少無聊嘢，再睇套戲，已經隨時二三百蚊；喺佢嘅面上又未見到佢甜到漏嗰絲笑容嘅，不過我知佢拍拖其實都幾開心，正如我同Wendy食飯，喺樓下撞到EX，返工識到Angel都好開心。
我最想係搵Carmen玩，但我無呢個勇氣。
喺我煮緊飯嘅時候，佢又攞部keyboard出嚟練，我諗佢都敬業樂業嘅，應該唔想得失的fans。
其中一首係金句王黎明唱嘅夏日傾情，好輕鬆，柔和，舒服；夏天都差唔多嚟到，唔知我又有無得傾情呢…點知，我眼前浮現咗Wendy個面孔出嚟；真係死火，唔好咁得唔得呀，你估我唔想試下咩，我都好想掂下女人…但我實在係唔想煩。
因為我真係唔知QQ佢點諗。
食完飯佢又開始set場，換衫…喺我嘅視角佢係準備返工，條波罅就係搵錢嘅工具，無乜感覺…
我：「我都落去開工，唔阻妳喇。」




Q：「好呀，一齊畀心機啦！等你返嚟。」
一齊溫書，一齊搵錢，成日都有錯覺我同佢已經變咗做一對夫妻，但當我一清醒返就知乜都唔係。
※※※※※
我：『女王有嘢益你。』
肥：『女王？乜柒女王？』頂佢個肺，佢重要喺後面加個攤開雙手嘅黑人憎emoji，睇嚟佢平時對人嘅衰衰格格都係無乜改過。
我無理到佢，send咗行網址畀佢，過咗一分鐘…
肥：『對唔住！小人我罪該萬死！求女王大量不記小人過！我掌自己嘴！』再加三個叩頭emoji。
佢都幾極端下，其實幾得意，雖然唔想對住佢。
我：『你都叫幫過我，益下你啦。』
肥：『女王大人，妳要衝乜榜？我即刻充值！』




唉，雖然我係想使錢，但都唔想咁。
我：『唔使喇，我無榜要衝，玩下啫，禮物嗰啲隨緣啦，你喺度幫我掛下人氣，講下嘢炒熱氣氛就得。』
肥：『收到，即係做衛兵！』
睇嚟佢重熟過我，我都唔識呢啲term…