為了實現媽媽遺願，我成為了女兒國唐僧: 626

W：「吓，點解呀，因為同個女仔一齊唔開心？」
我：「唔係嘅…可能因為…太多嘢唔明，唔知自己想點，唔知對方想點，剩係得嗰啲嘢，好似顯得自己係個壞男仔咁。」
我唔介意佢覺得我壞，橫掂佢一直覺得我曳。
W：「咁你做返個好男仔咪得。」
我：「有啲嘢唔係想就做到㗎，好似計數咁，係可以睇極都唔識，正如女仔諗啲乜，有機會我哋一世都諗唔明。」
W：「點會喎，直接問咪得，如果你唔明我嘅話都可以直接問我。」
我：「好呀，但…關係唔同咗之後，就未必咁簡單㗎喇。」
W：「唔…講到咁玄㗎。」
我：「或者啦，所以先話我都唔知自己想點，最清楚嘅就係，而家應該乖乖地專心讀書。」
W：「又啱嘅，咁我哋之後多啲一齊溫書啦。」




食完嘢，我哋各自返屋企，唔想佢誤會所以就無送佢嘞；我覺得，佢都係出於無聊，同埋好奇，先想有我呢個男仔friend啫，應該係。
交叉仔，你唔係以為自己係男神呀…
Q：「交叉豬，返屋企嗱？」一開門，見到個超假嘅女神，帶住甜蜜又邪惡嘅微笑，雙眼亮晶晶咁望住我；成何體統！似啲乜？似歡場嗌老細嘅女仔。
我：「係呀，妳搞乜鬼…」
Q：「無呀，我第一次見到你咁勤力喎，由放學三點幾就開始溫書，溫都差唔多六點先返屋企，犀利到呢，你媽媽知道你咁生性一定倍感安慰。」
我：「咪玩啦，溫下抖下㗎嘛…」
Q：「係呀，同韻婷去咗邊度抖呀？天台？地牢？實驗室？定係女廁廁格噢？」
坦白講，日日對住個咁人世鬼大嘅靚女，係會有啲頭痛，奈何我又唔可以對佢點。
我：「無呀，人哋不知幾正經，都係謦下欬咁咋，返嚟之前同佢去七仔咬咗少少嘢，就係咁。」
Q：「唓，咁無聊嘅，都唔好玩。」佢變返正常樣。




我：「真係溫書㗎，唔係玩，計咗三十條數都有，同埋…我覺得佢無乜特別，似係想有個男仔friend啫。」
Q：「呢個年代，重要係你，唔係同我講乜男同女有純友誼呀，當我細路女咁呃呀？」
我：「點解…唔可以喎…」我想同佢講我同啲EX變咗純友誼，但咁講似乎好有問題，而我更加唔敢話同佢係純友誼，好似捉蟲入屎窟咁。