thriXt Qantasy 純文字安眠之作 (New: - U2K - 一直上架): 625

我：「女神…樣靚身材正，男仔係會好天然咁被吸引到，不過佢哋係想又遠觀又褻玩，如果可以令到女神喺自己身邊就會好威，但好多時其實唔明女神係一個點嘅人，相唔相處到，溝唔溝通到，夾唔夾都唔知㗎，衰啲講句見到靚女咪狗衝囉，當買六合彩，可能女神會發神經揀你嘅，哈哈…」
W：「佢同你坐嗰陣都好開心吖，你有無諗過追佢㗎？」
我：「點會喎，一嚟佢有男朋友，二嚟佢屋企…咁有家底，我何德何能喎，幻想下就得。」
W：「但就算追唔到，都可以認真做朋友。」
我：「唔…啦，佢份人其實好高竇，㤿憸聲悶難服侍，加埋佢身邊啲女神朋友…玩下氹下佢哋開心都唔錯嘅，真心交流嘅話，我怕會谷到成肚氣。」
W：「不過佢哋好靚女。」
我：「靚女又點，又唔係俾你掂嘅，係啲傻仔先會圍住佢哋做兵轉。」
W：「唔通你哋而家就一啲友情都無？」
我：「可能…一齊坐嗰陣都無乜㗎咋，不過話唔埋有朝一日又坐埋一齊，咪繼續嘻嘻哈哈…」
W：「你唔諗住再同佢聯絡㗎嗱？」




我：「搵佢，咪盞好似有啲乜咁，費事俾佢笑啦，到時佢又沾沾自喜話我拜倒佢嘅美色。」
W：「咁…我同你…係咪都只不過係咁…」
死火，剩係顧住撇清QQ嘅關係，講得太硬添…
我：「咁又唔係嘅，比起佢…妳平易近人好多…」
唉，我都唔知點讚佢好，就係勝在夠平凡囉。
心底嗰句就係，入場費低無乜人爭容易食，只不過而家我唔食得咁解。
W：「係咪㗎，真係唔係一齊坐返先嘻嘻哈哈？」
我：「唔會啦，何況上次同妳一齊坐…係激到妳嬲到反艇。」
W：「算啦，都過咗去，你又無以前曳得咁交關，我亦唔會再咁小氣…咁，我哋無得一齊坐嘅話重會唔會係朋友嚟？」
我：「呢個就…如果妳想嘅話，就當然係。」




W：「你話㗎，唔準到時扮唔識人呀。」
我：「唔會啦，點會扮唔識人呢，邊個搵我我都會理佢嘅，不過我好怕醜㗎咋，未必會主動搵女仔，到時妳搵我實烚熟狗頭咁應妳。」
W：「唔信呀，你怕醜？明明就拍過拖…」
我：「就係拍過，先怕醜…因為有啲迷失。」