為了實現媽媽遺願，我成為了女兒國唐僧: 624

如是者，佢小便完就返嚟繼續同我計數…
唔好問我做乜係咁諗住女仔小便！青春期嘅男仔係諗埋呢啲無建設性嘅肉酸嘢㗎啦！
結果去到五點幾，我個肚開始打鼓。
平時呢個時候喺屋企，一路溫書一路有零食㗎嘛，你問我有乜零食？係咪無聽書呀，屋企重有三罐黑罐曲奇呀！QQ食完一罐就厭咗掂都無掂過，今鋪我直頭可以食到暑假。
W：「咦，你係咪肚餓呀？」
圖書館咁靜，唔覺意俾佢聽到添，好彩唔係放屁啫，但自從QQ教路之後我都識放無聲屁，不過如果個女仔喺妳隔籬就有無聲都死啦，除非你識放無味屁。
我：「係呀，小小咁啦。」
W：「都差唔多夠鐘，不如我哋去搵啲嘢食咯？」
我：「可以嘅，但妳有無乜嘢想食？」
W：「吖，你諗啦，又係你話出咗糧會請我食嘢。」




日日同佢謦欬，佢而家大概都知我返工做啲乜，人工有幾多，同埋幾時會出糧；關於返工嘅嘢我就唔諗住保密嘞，反正同QQ無乜關係，我自己一個人悶得滯，想使錢咪打下工，同以前晚晚躝街差唔多啫，只不過係換咗笪地方。
我：「通常呢啲鐘數，我都係去便利店是但買啲嘢食就算，睇下妳介唔介意…」
如果早啲都可以去茶記或者快餐店整個tea set，但而家就真係唔湯唔水。
W：「好呀，無所謂，都係陪下你咋嘛。」
就係咁，我哋兩個去咗七仔，我嗌咗個魚蛋拼燒賣撈麪，佢就攞咗包日式餃子，咁啱玉泉梳打水十二蚊兩枝，攞埋就啱啱好，無糖應該啱佢飲掛。
自從成日都要煮嘢食，我就幫襯少咗便利店好多…
W：「阿爽，你會唔會掛住Queenie？」
佢無端端咁問，嚇到我爭啲噴咗啖麪出嚟。
我：「呀…我做乜要掛住佢，咪話咗我同佢無嘢。」
W：「唔係呀，咁你話同佢坐隔籬所以friend吖嘛，但而家分開咗咪好似小咗個朋友咁囉…」




我：「呢個…都係嘅，咁我而家夠同妳friend。」
W：「朋友係咁嘅咩，無得一齊坐就無咗…」
我：「我都唔知呀，多數同女仔一齊坐就會咁，如果分開坐重成日搵對方唔係好怪咩，男仔嘅話通常可以捱耐啲，分咗班都可以搵下嘅。」
就好似我同肥豬咁，有共同語言，一講起挖坑䚎裙底就乜嘢友誼都反晒嚟，直頭all land side（Auld Lang Syne）！
W：「但係你心入面，會唔會想搵佢？」
我：「無特別嘅…一齊坐，咪嘻嘻哈哈咁，但而家搵佢又可以為乜，佢身邊咁多男仔圍住，少我一個都唔少…嘅。」
W：「係咪男仔都會鍾意女神？」
我：「呢個…睇落係囉，妳想聽真話？」
W：「嗯，你話我知啦，橫掂我又唔係女神。」