thriXt Qantasy 純文字安眠之作 (New: - U2K - 一直上架): 614

佢去做女僕侍應我都接受到嘅，係有少少擔心，再過態嘅話就唔好喇…我寧願自己賣身去做鴨，如果有人要的話…
Q：「唉，你咪傻啦，係都諗辦法撬男朋友啲錢先啦，懶得理你！夠鐘喇，快啲行上去…」
都唔使我諗，佢已經扯住我隻手嚟行。
我：「咁急嘅？趕住去邊呀…」唔通去睇戲？如果溜冰嘅話應該唔使趕呀？
Q：「無呀，去食飯咋嘛，成日喺屋企食好悶。」
呢層我認嘅，來來去去都係嗰十樣八樣，外賣都係燒臘多，但我只係一個小朋友嚟重想我點喎；喺附近食又驚撞到熟人，去得遠又麻煩兼且嘥錢嘥時間…但偶一為之都要嘅。
不過又一城有乜好食？Food court？定係城大canteen呢？咪同樓下快餐店差唔多，呢度其實無乜嘢係啱我哋食。
轉眼間佢就拖住我嚟到一間叫Dan R…嘅西餐廳，望落門面就好企理，加埋開得喺又一城…
我：「我知道妳鍾意食好嘢，但妳諗清楚未…」
要數返上次食好嘢，已經係開年飯嘅文華廳飲茶，對住QQ我當然唔會直接say no，亦唔想係咁講個貴字，因為我知道佢本來就係呢種女仔；如今我都叫搵到少少錢，食一餐半餐未至於話攞咗我條命，只係我都想佢諗清楚先，因為食完呢一餐好可能就要喺第二度慳返。




Q：「唔使咁驚喎，今餐我請嘅！」佢一副調皮樣…
我：「妳請？媽媽…派咗特別花紅畀妳？」
Q：「乜呀！你唔記得我有兩日人工咩？！」
兩日人工…攞嚟買燒臘飯就好禁使，呢度喎…
我：「記得，但呢度啲嘢，隨便食都無咗成日人工…」據我經驗，最平一碟意粉都百五至二百。
Q：「嘻嘻，嗱，畀你睇下嘞。」佢將電話遞嚟。
我：「呢個係乜嚟㗎？50%？」
Q：「你估剩係你識精明消費咩，我都有做功課㗎，呢個App叫eatigo，呢張係我前幾日搶返嚟嘅早鳥晚餐半價券，正價餐牌上面所有嘢都半價！」
我：「聽落又好似幾抵，但啲嘢食掂唔掂㗎？」
啲人成日話平嘢無好，我覺得啱一半啦，正如我屋企附近嘅舊墟街市，燒臘飯廿蚊盒，係平過人呀，但啲肉就少返三四成，咁又有乜用？




Q：「我以前同屋企人食過好幾次，同男朋友都食過一次，正常水準囉，我都想知特價完有無分別。」係嘅，佢熟路係好正常。