為了實現媽媽遺願，我成為了女兒國唐僧: 615

我：「不過，妳買條校裙都已經無咗幾百…」
Q：「乜呀，我二手收返嚟㗎，一百都唔使！」
我：「吓，咁大隻蛤乸隨街跳？好新淨喎！」
我望一望佢個膠袋，係雪白色嘅布料。
Q：「係，係呀…人哋新買，話長得滯，咪放囉…」
我：「邊有人嫌裙太長㗎，著耐啲咪啱身囉。」
Q：「乜呀！太長好鶻突㗎，搞到拖地婆仔咁。」
我：「係喇係喇，越短越靚女添呀，咁妳唔使買都得，嘩，如果著到中六…」
Q：「作死你呀！係咪要全世界睇晒我底底你先安樂呀？！當我係乜喎？」再隨之一槌打落我肚度。
喺佢嘅經常性暴力對待下，我嘅反應神經早就變得好敏感，將腹肌輕輕一拉就已經化解咗佢嘅攻擊，同埋佢唔係好大力啫，唔好打雞雞就得。




女人真係一時一樣，一時嫌短，一時嫌長，對付佢哋，唔硬起上嚟係唔得嘅。
我：「當妳係女神…咁妳話事啦，但就算半價都好，喺度食一餐應該用晒妳啲人工㗎喇喎。」
Q：「咁人哋平時有你養吖嘛…呢幾百蚊人工係我自己搵返嚟，我想自己話事決定點用。」
QQ搞乜，無端端話有我養佢，實在令人面紅。
同埋乜邏輯嚟，即係我嘅錢係佢用嘅錢，而佢嘅錢就係佢決定點用嘅錢？無所謂啦，望住佢咁可愛嘅樣，要我劏埋個腎出嚟都得呀…我…我…好想抱住佢，好似對情侶咁，一齊去西餐廳。
Q：「嚟啦，聽我話，一齊入去。」
未等我鼓起勇氣，佢就已經攬住咗我…每一次都係咁，佢就好似知我個心諗緊乜，先發制我。
QQ真係好乖女，我知道妳已經盡咗力；我輕輕掃一掃佢嘅背脊，就拖住佢入咗去。
佢show個電話畫面畀個侍應姐姐睇，好順利就被帶到座位，重要係卡位嚟添！可能星期二無乜人啦，而個場好多都係上咗年紀嘅人，喺香港邊啲人會有大把閒錢嚟呢啲餐廳食，大家心照啦。
我同QQ打對面坐，張枱都幾闊下，呢種距離感…




我哋各自打開一本厚厚嘅餐牌，我先睇意粉嗰版，一如我所料係大約一百三十至一百八十，如果半價，再計返加一，即係六折…大約八十蚊到百一蚊，唔可以話平，但已經好合理。
我想講我數學唔渣㗎，一般嘅數我都識計。
Q：「你有無嘢想食呀？」
我：「我乜都食嘅，妳話事啦…妳請㗎嘛。」
Q：「就係請你食先想你揀啲自己鍾意食嘅嘢吖嘛，平時又唔會食呢啲嘢，唔想估估下呀。」
我：「嗯，唔係沙律就得㗎喇…」