為了實現媽媽遺願，我成為了女兒國唐僧: 611

我：「唔係喇…同佢，只不過係普通同學，而昅佢，又同喺街昅任何一個女仔一樣，大波就望下㗎啦，希望妳唔好誤會我哋有啲乜。」
我唔敢話同佢係朋友喇，因為我平時都自稱QQ係我嘅朋友嚟，但朋友又邊夠描述我哋而家嘅關係，至於準確嚟講要點界定我都唔知。
Q：「係呀係呀，信你咯，同人哋第一日坐就一齊食lunch，謦到雞啄唔斷，真係好同學。」
咁我哋坐咗兩個禮拜就住埋一齊又係乜事？
我：「其實…我同佢係一早就識，小學同學嚟…」
Q：「吓？！乜嘢話？但係…以前嘅就唔計啦，但我同咗你一齊坐之後，從來都未見過你同佢講嘢㗎喎，咁樣嘅小學同學？」
我：「其實，我小學做咗啲嘢激嬲佢，咪一直唔敢搵佢囉，佢又唔同我講嘢，所以咪咁。」
Q：「你…唔係小學就非禮人呀？䚎裙底？定揭呀？唔通你迫人哋陪你玩閹？」女神妳當我係乜…
我：「無，我玩塗改液潑到佢條校裙，嬲咗我。」
Q：「睇嚟，我太睇小你低B嘅程度…」




我：「乜嘢喎，得嗰四年班咋，你想我點呀？！」
Q：「唓，我唔覺得你而家有啲乜長進囉。」
我：「起碼我唔會亂攞妳啲化妝品嚟玩吖。」
眾所周知，塗改液係指甲油嘅其中一種。
落完底油就重可以喺上面寫字畫公仔，一樂也。
Q：「你敢！我已經無乜錢買化妝品，你試下亂嘥我啲嘢吖，等我用廣告彩幫你化妝。」
我當然知佢無錢買啦，雖然我唔識，都知佢而家死慳死抵咁用，買啲平價貨，又或者唔知喺邊攞啲sample嚟用咁；而且佢化好淡嘅妝，輕微修飾下已經好出眾，所以呢方面都唔成問題。
我：「都話唔會咯！總之妳而家明啦，我同韻婷就係咁樣識，所以無任何特別。」
Q：「嗯，咁人哋重有無嬲你呀？」
我：「無喇，都過咗咁多年…佢話已經一早無嬲我，只係如果無端端搵我講返又好似有啲怪，所以咪一直都咁囉，而且我已經認真同佢道咗歉，咁佢話重新認識下…咪同我一齊食lunch囉。」




Q：「嗯，知喇，其實都唔關我事。」
我：「唔關妳事又做乜提佢？」
Q：「咁我係…關心你調咗位之後開唔開心嘛。」
我：「OK咁啦，冷氣夠凍，可以睇下出面風景。」
雖然同妳分開咁遠係有啲唔捨得，但只要等放學…
Q：「我都OK，你唔喺隔籬我上堂專心好多…喂，唔講無謂嘢喇，快啲開枱做晒啲功課先。」
如是者，我哋繼續日復日嘅日常，到咗第二日。
返學上課室嘅時候，咁啱QQ同Yvonne，Zilvia三個一齊喺我前面，自然而然就會仰望春天的景色…噢，Sorry，香港嘅四月其實已經可以叫做夏天。
而夏天，就會為大地帶嚟雨水同美腿。