為了實現媽媽遺願，我成為了女兒國唐僧: 610

我：「Sor…Miss Tang…」講呢啲嘢真係會興奮…
鄧：「你係咪想同我講，無論你同邊個坐埋一齊都可以咁多嘢講呀？」我有信心，如果Miss Tang唔係返緊工，我都可以同佢係咁講，例如探討下佢而家究竟有男仔追未，或者第一次嗰陣係幾時…
我：「對唔住…一時顧住…同新同學互相認識。」
鄧：「你中三㗎喇，係咪重想我罰你出嚟企呀？」
點解，永遠錯嘅都係我，隔籬女仔就係無辜？
我：「唔係，唔想，唔敢，我收聲…」
鄧：「後面有四個位無人坐㗎喎，使唔使我調你去自閉下？等你開開心心到放暑假？」
我：「唔好呀…」我一路擰擰頭…
你話罰反而無乜嘢，我驚佢玩嘢心態重大鑊，到時我就要陪埋佢玩，咁就永不超生。
鄧：「咁你好同我乖乖地上堂喇下。」




講到咁，我重唔封口粒聲唔出咩…然後我左望下，無右望呀，因為右邊就係窗嚟；有啲同學就因為我俾人鬧而忍緊笑，阿健就好似慣晒咁望住我食花生，QQ嘅神情就有啲微妙…好似對我好不屑咁。
我都係對呢課書有信心先唔專心聽書啫。
過咗一陣，Wendy塊面亦都無再紅。
而我，仍然係覺得中文堂百分之二百咁悶。
除非，Miss Tang同我哋研討陶淵明身上朵菊花有無盛開到變太陽花啦。
我：『對唔住呀，攪到俾人鬧添。』
死心不息嘅我，寫咗張紙仔放喺隔籬枱。
W：『唔關我事呀，係你畀人鬧啫。』
如果我隔籬位係男仔，我一定會抗議Miss做乜偏心剩係鬧我，就算寧願一齊罰，我都唔想剩係鬧我，公平係呢個世界嘅普世價值嚟…但而家係女仔咯，我當然乜都可以哽晒佢頂罪，就算要畀Miss打pat pat我都在所不辭。
我：『嗯…我都慣，總之一切平常心啦，雖然我有時睇落好曳，同埋傻傻地咁，但我無惡意。』




W：『無話唔信你，都多謝你同我講咗咁多嘢，平時無乜男仔同我溝通嘅，不過我而家要聽書先。』
太好喇，佢無唔開心；不過呢，我一來驚Miss又動真格，二來再趴喺度擔心韻婷誤會我又昅佢，所以剩返落嚟嘅時間我都正襟危坐；鍾意嘅花呢…QQ係玫瑰？Wendy嘅話…鬱金香？百合？細蚊係丁香？Carmen係食人花？Yvonne梗係曼珠沙華…
想我專心上堂？難過登天…
到咗放學，無乜特別嘢發生，我同韻婷講咗句bye就各自離開，咁我就梗係返屋企等QQ啦，因為已經同佢分開咗成八個鐘咁耐喇！同埋今日星期一佢應該無乜特別嘢搞。
果然，過咗一陣佢就返到屋企。
我：「Queenie返嚟嗱？」
Q：「做乜呀？有需要搵我咩？」佢整個冷淡樣…
我想話好掛住佢㗎，但身份上面唔係咁適合。
我：「成日無同妳講過嘢，好唔慣吖嘛。」
Q：「睇嚟都唔需要吖，你已經搵到個好好嘅替代品。」做乜喎，唔通佢…呷醋？但又點會呢…




我：「唔關事喇，只不過…邊個坐我隔籬我都係咁講嘢㗎啦，妳又唔係唔知。」
Q：「當然知啦，你係又花心又多情嘅交叉仔。」
我：「點…點會喎！普通吹下水做乜咁話我？」
Q：「睇你個樣就知你想到處留情啦，好在你唔係女仔咋，如果唔係實水性楊花潘金蓮咁款。」
潘金蓮？乜卵嚟？係咪蓮花嘅一種？