為了實現媽媽遺願，我成為了女兒國唐僧: 566

我：「嗯，無問題呀，就算開返學，放學趕過嚟都可以嘅，我諗大概五點後就得。」
何：「呀，想問埋妳先，妳識唔識煮嘢食㗎？」
我：「對唔住呀，我唔識㗎，沖下茶都重得嘅…」
何：「唉，要搵個識煮嘢食嘅女僕真係好難，請個真嘅廚師又好唔化算，結果我每個禮拜都要煮足六日…係呢，妳有飲開茶嘅？」
我：「都有嘅，earl grey，darjeeling，chamomile咁，如果中國茶就飲綠茶同烏龍多。」
何：「睇嚟有啲研究咁喎，飲開乜嘢brand呀？」
我：「F&M…又或者Tea WG咁…」
何：「呀哈…呢度買唔起啲咁貴嘅茶，都係得Twinings咁。」女僕長佢苦笑。
我：「無所謂嘅，其實都係差唔多。」
何：「都唔明妳點解會想嚟打工…」




我：「妳應該會明嘅…」
何：「唔緊要啦，反正我等人用，多個女僕俾我call返工都好…呀，不如妳沖杯茶畀自己飲。」佢指住櫃上面嘅茶具，重有Twinings茶包。
於是我就隨手攞咗包earl grey，放熱水，泡咗大約一分鐘，倒咗杯熱茶出嚟。
我：「妳係想睇我識唔識沖茶？」
何：「唔係呀，諗住請妳飲啫，都沖得好標準。」
我：「咁個茶包…」問題嚟喇，以前就算係F&M，我都只會沖一轉就掉，但係而家…
何：「如果係沖畀客嘅話，都係會沖一轉嘅啫，除非佢哋特別要求啦，但通常我會攞返入嚟自己飲，妳放喺度得喇，我會處理…咁我而家執套衫畀妳攞返屋企試，妳出去飲住杯茶等一等我啦，順便睇下沙織佢點做嘢。」
於是乎，我就攞咗杯earl grey出去坐；出到去見到個肥仔已經食完個蛋包飯，正喺度用叉捲緊啲意粉，重要食到嘴角都係肉醬，實在十分之嘔心；而沙織嘅工作呢，不外乎都係行行企企，間唔中同客人講兩句嘢賣下笑，執拾下枱面，攞本留言簿畀啲客寫字，同埋幫宅男喺佢哋隻game入面抽卡…
條毒撚應該係已經坐夠咗一粒鐘，沙織走埋去同佢講咗幾句，然後佢就怕怕醜醜又點咗杯咖啡…真係陰功，為咗望下女女就要畀成三十幾蚊飲杯普通到唔普通嘅咖啡；而條肥仔就繼續狂風掃落葉咁清晒碟意粉，一邊啜住杯粉紅色嘢飲一邊沾沾自喜咁望住我，都唔知搞乜，今日返工嗰個又唔係我。
佢個樣真係好討我厭，以為自己著得光鮮少少就可以喺度招搖…你知唔知以前大小姐我著對波鞋都七八千，個手袋都兩三萬銀…俱往矣，數風流人物，還看今朝…其實我無乜資格話佢。