為了實現媽媽遺願，我成為了女兒國唐僧: 565

我：「我明白嘅…不過呢啲都係簡單嘅食物嚟，相信點都有返一定水準嘅。」
何：「嗯，妳對我有信心就好…咁呢，由於我哋鋪都只係小本經營，人工就無可能太高㗎喇，初初嚟到就五十蚊個鐘啦，如果做耐咗都有得加少少嘅，想問下妳有無問題。」
我：「無呀，同我想像中差唔多。」
雖然唔係最低工資，但其實都係好低，重少過交叉仔；不過無辦法啦，我而家無得揀，論工作性質亦算得上係比較輕鬆。
何：「可能妳喺出面等都見到，如果食滿某個消費額嘅話，啲客係可以加錢同女僕影即影即有，或者寫心意卡咁，呢點想問下有無問題？同埋呢啲額外收入嘅話，我哋都係會全數畀返妳嘅。」
我：「都無嘅…我OK呀…」只要唔流出嘅話…
何：「另外呢，如果妳有畫開畫，或者有手工藝品，甚至乎寫真嘅話，都可以放喺度寄賣嘅，當然啦，個定價就唔好太過份，間鋪無位長期放太多嘢，主要都係想順便幫下妳哋一班女僕。」
我：「呢個或者等遲啲先諗啦…但係，我而家有一個疑問…」
何：「嗯，係乜呀？妳即管問啦。」
我：「請問…如果未夠十五歲係咪唔做得嘢㗎？」




何：「吓！原來妳未夠十五歲？」女僕長佢一面驚訝咁望住我，彷彿好似睇到戀童癖受害者咁。
我：「係呀…重爭幾個月先夠十五歲。」
何：「睇唔出妳咁細個喎…憑妳個樣同身材…如果我無記錯呢，十三到十四歲係要家長同意先可以做嘢，重要上報勞工處，我哋呢啲小店就無咁多心力同政府周旋喇…」
即係點？我要等幾個月之後再嚟？
何：「不過呢，呢個問題喺呢行都幾常見，如果妳唔介意用交流生嘅身份，或者我朋友嘅身份嚟幫手嘅話都可以，但係我就唔會同妳簽任何嘅文件，但妳可以放心，妳每日收工我就會出返現金糧畀妳，但變相就無咗顧員保障，不過其實妳都係兼職，就算成為正式顧員都畀唔到乜福利妳，最多係有個勞工保險，但妳唔使入廚房，個保險相對嚟講無乜用，我諗呢度算安全掛。」
我都知做生意其實係好複雜嘅一回事，但呢一刻我無餘力去諗咁多，只係想嚟搵少少錢。
我：「可以呀，呢啲都唔係問題嚟。」
何：「妳而家係放緊復活假呀可？如果可以嘅話，不如聽晚就嚟試工，到時會有個比較資深嘅女僕喺度。」