為了實現媽媽遺願，我成為了女兒國唐僧: 567

過咗陣沙織就攞咗個裝住衣物嘅膠袋出嚟遞畀我。
妹：「恭喜妳呀，睇嚟我哋好快有機會一齊返工。」沙織滿面笑容咁望住我，應該係真心嘅，乜佢唔驚我搶咗佢飯碗嘅咩？
我：「嗯，以後就請多多指教，沙織姐姐。」
妹：「女僕長叫妳聽日五點嚟到鋪頭，預九點半收工，如果唔想食肉醬意粉嘅話就食埋飯先返工。」
我：「知道，我會食埋飯先返嚟㗎喇。」
妹：「其實女僕長煮嘅肉醬意粉幾好味㗎。」
知，我好清楚，望住肥仔食得津津有味嘅樣，應該唔會太差嘅…但加埋一要八十八蚊嘅肉醬意粉，實在同意粉屋不遑多讓。
如是者，我同沙織道別，攞住袋衫踏上歸途。
呼，太好啦，竟然第一次見工就有工開。
五十蚊個鐘，五點到九點半有四個半鐘，即係二百二十五蚊，扣埋車錢都夠我用兩三日嘅，點都可以幫補下，唔使交叉仔慳得咁辛苦。




哼，我係唔會輸比你㗎！死人交叉仔！唔俾你包養我呀！雖然暫時我點都要住喺你屋企度…
※※※※※
Q：「點呀！靚唔靚先？」
黑白色嘅女僕裝，半髀嘅短裙，加個花邊頭箍，重有絕對領域嘅長黑襪，我勁想變做一隻舔狗，瘋狂咁對佢隻大髀發動進攻，將內裡嘅少女香氣嗦入個肺度，一定可以延年益壽。
我：「妳…妳…同條仔玩女僕play呀？」
Q：「我僕你個頭呀！我先唔會咁益佢…」
我：「我重以為妳會俾佢綁起…然後出到成身都係，掛喺個木架上面擘到大一大畀佢影…」
Q：「你黐線㗎？！係咪女僕同女奴都唔識分？」然後一掌打落我心口…
我：「嘩！打人呀！呢度有暴力女僕作反呀…」
Q：「點啫！你重未答我喎，靚定係唔靚？」




我：「靚…實靚…著乜都咁靚，雖然我覺得乜都唔著係最靚…」然後我又捱多佢一掌…
我：「妳係搞乜東東呀，要去cosplay呀？」
Q：「唔係呀，我有工返喇。」
我聽到佢話有工返，擘大口得個窿呆咗望住佢。
我：「妳去…返工？」
Q：「係呀，去搵錢呀，你剩係識得諗埋晒啲淫賤嘢，不知所謂！」佢撓起雙手不屑咁望住我。
我：「Queenie…妳去邊度返工呀？」
Q：「同你差唔多，去女僕餐廳做侍應。」
我：「得唔得㗎…妳平時都唔係做開嘢。」
Q：「有乜唔得喎，搬下嘢食，收下碟咋嘛。」




我：「定係去畀人視姦呀…咪住先！間餐廳係喺邊度㗎？」雖然我從來都未去過呢啲地方…
Q：「咪…旺角啲樓上餐廳囉。」
我：「得唔得㗎？！會唔會好危險？」