為了實現媽媽遺願，我成為了女兒國唐僧: 564

何：「其實剩係睇到妳個樣嘅話，我都會請硬妳，呢個行業靚女就係最珍貴嘅成本。」
我：「太客氣喇…我受唔起呢個抬舉…」
何：「但係…就我睇嚟，妳唔似係會出現喺呢度嘅女仔，就算喺旺角街頭，都好難搵到妳呢種。」
我：「係咩…我有時都會嚟行街嘅…」
我實在唔敢講以前都係習慣落樓下圓方行街…旺角嘅話，通常都係因為方便拍拖，又或者同班八婆姐妹無聊周圍蕩先會嚟到…而且主要行新世紀同埋朗豪坊，又或者過隔籬奧運站，因為Yvonne住喺嗰頭。
何：「開門見山啦，妳又唔係鍾意做女僕，又無玩cosplay，睇落亦唔係啲傻下傻下嘅MK妹，應該都係純粹想搵份工啫，係咪？」
我：「係呀…不過我會努力工作㗎，亦都會守時，唔會無端端唔見人，能力做到嘅嘢我都會學。」
何：「睇嚟妳都知我會俾啲女僕激到死死下…」
我：「嗯…其實我無諗過，但我會做好自己。」
何：「返返下工話要走人，原因係要去拍拖，問妳死未，唔放佢走就話唔撈。」




我：「欸…咁過份，但呢件事唔會發生喺我身上。」
何：「無辦法啦，好多妹做女僕，都係一份玩玩下嘅心態，覺得自己係萬人迷咁…」
我：「我係想工作，唔係嚟玩，女僕都只係一個綽頭啫，如果自己都太沉迷就唔係幾好。」
何：「咁妳都應該清楚女僕cafe係賣乜㗎啦？」
我：「呢層呢，我都知嘅。」
何：「放心啦，我哋呢度都係正經鋪頭嚟，唔會要妳著啲太暴露嘅服裝，一般嚟講呢，都係同出面沙織姐姐嗰套差唔多，條裙係會冚到半髀嘅，下面就著返絲襪啦，普遍啲客而家鍾意絕對領域，但就唔係強制嘅，不過就唔好太短啦，咁裡面啲打底妳就自己搞掂，有無問題？」
我：「衣著方面無問題，我識點做㗎喇。」
何：「妳咁靚女，身材又好，如果第時受歡迎嘅話可以喺妳意願之下搞啲特別服裝活動嘅，我都會盡量配合返妳，咁活動啲額外營收係可以拆返畀妳嘅。」
我：「呢啲就將來先諗啦，或者等我熟習咗先。」
何：「嗯，咁…其實我都識整嘢食㗎，以前學過兩年廚藝，但畢咗業先知女人喺香港呢一行好難生存，酒樓同茶餐廳一般都唔會考慮妳，亦都辛苦到近乎捱唔到，做過兩三年薩莉亞同米線鋪，自己唔係幾頂得順，所以先開咗呢間鋪頭。」




我唔係幾知道佢點解同我解釋呢啲，應該係怕我懷疑佢煮嘢食唔掂，所以開間咁嘅鋪賣妹妹仔用啲垃圾食物呃啲宅男掛。