為了實現媽媽遺願，我成為了女兒國唐僧: 560

真實文學推介：
http://tushiou.blogspot.com/2007/10/blog-post_03.html?m=1
簡陋嘅blog，按左制可去下一篇。
私心覺得最好睇嘅遊記blog，關於一個台灣大男孩騎單車旅行的故事，由北海道到沖繩，環台，大陸深度遊，阿拉斯加到秘魯，未完的環遊世界…

靠入口埲牆呢，就放咗個正方型鞋櫃，即係日本學校畀人放PE衫褲同鞋，然後女仔衣物成日俾男同學偷嗰隻，重有嗰啲無人拎返屋企好多口水嘅牧童笛…
唉，都唔知係咪黐得個死人交叉仔多，自自然然就會諗咗去啲衰嘢度…又雖然…嚟得呢啲地方嘅男仔應該都唔會諗啲乜好嘢。
咁呢度就攞咗一半嚟畀客人放背囊等嘅隨身物品，而另一半就放咗漫畫，重有啲日文雜誌，game書咁，亦有介紹女僕文化嘅書同食譜。
可能…無乜客嗰陣何小姐會出嚟溫食譜。
中間嘅擺設就係傳統嘅學生書枱同凳，即係我平時返學坐嗰一set，如果喺度做嘢可能會幾有親切感；枱上面有一塊戙企嘅膠牌，一邊係純文字嘅餐牌同埋特別服務嘅明細，另一邊就有課室守則，例如唔可以私自影相，唔可以觸碰值日生，唔可以喧嘩同粗言穢語，唔可以浪費食物，每份主食用餐時間限一個鐘，特飲就半個鐘…




都幾細心㗎喎，咁我都安心啲。
成個場其實好細，只係有十set枱同凳，不過就可以因應客人狀況嚟隨時擺位，好似幾方便咁；呢個時候就只有五個客人，我都唔知算係多定少嘞，總之比起交叉仔嘅返工環境，呢度一定冷清好多，嗰度一枱阿叔都可以嘈到黐線。
同樣都係賣樣賣身材，我諗啤酒妹同女僕…其實我都唔識分孰優孰劣，但起碼啤酒妹唔輪到我揀。
五個客人，兩個係一齊坐比較成熟嘅油膩宅男，即係帶住眼鏡大大嚿黑黑實實滿佈鬚根嗰啲，著住件完全唔搭調嘅日本卡通T，戴住耳筒喺度玩app game；一個就係又瘦又細粒嘅毒撚，兩隻手攞住本漫畫，眼神古古怪怪，感覺上有啲似加強版嘅細龜同學，唔想形容太多；一個係死肥仔，白白淨淨，眼神輕佻，著住周身名牌，名顯地係一個俾父母種壞黑人憎嘅二世祖，可能…我自己以前都差唔多；最後，重有一個其貌不揚嘅女人，似係初中剩女嚟，呢個初中唔同讀書嘅初中…喺度左手攞住本小說，右手攞住杯嘢飲，聚精會神咁沉醉喺文字世界入面。
嚟得呢啲地方嘅人通常都唔太正常，我係預咗。