為了實現媽媽遺願，我成為了女兒國唐僧: 561

最緊要無熟人喺度，但我無聽過身邊人會嚟呢啲地方，最驚都係細龜，如果撞到佢應該唔會唱我掛？最多唱畀交叉仔知？
妹：「唔好意思呀，女僕長佢整緊嘢食，要麻煩妳等一等。」雖然佢已經知道我唔係客人，但係就仍然好好招呼。
我：「唔麻煩，係我驚阻住妳哋做嘢啫。」
其實我有諗過呢個鐘數嚟打攪人係咪唔太好，而且今日又係星期日…不過佢開十二點收九點半，呢啲cafe其實下午茶時段一樣有好多無聊人嚟；而且，我絕對唔想嘥多半日時間專登出嚟。
妹：「都唔會嘅，呢度唔算太忙。」
睇得出嘅，三個客做緊自己嘢，毒撚對住碟咖喱飯喺度渡過時間，肥仔應該係等緊嘢食嗰個；不過佢哋時不時都會擰個頭過嚟望一望我同埋無乜嘢做嘅沙織，都正常嘅，嚟得呢啲地方就梗係想睇靚女㗎啦，而我…又好似真係揚眼咗少少。
如果我要喺度做嘢，唔知係咪都要改返個日文名呢？直接用Kuromi得唔得？好似解黑東西咁…
我：「妳喺度做咗幾耐呀？」
既然都要等何小姐，我決定打探一下情報先。
妹：「就嚟一年喇，估唔到唔經唔覺做咗咁耐。」




我：「都算長喎…沙織妳係畢咗業？」
佢個樣重係好細個，頂盡都係DSE畢業。
妹：「未呀，我讀緊中六㗎，雖然last day完咗。」
我：「吓？！即係嚟緊就考DSE喇喎！」
妹：「係呀，好似重有廿日到，我都唔係好記得。」佢一面事不關己神態自若咁答我。
我：「咁…妳唔使溫書先咩？重嚟返工？」
妹：「無啦，溫咗都唔會識，最後都只係會得三幾分，多一分少一分無乜分別，咁不如腳踏實地諗下自己有乜做到，努力啲搵錢好過。」
我：「都係嘅…有啲工作其實有手有腳就做到，書本上面嘅嘢，好可能讀完成世都唔會用到。」
以我自己嚟講，自細受家庭背景薰陶，貫輸學識係好重要呢個概念，基本上我係同意嘅，雖然我就唔太想成日都要補習同學呢學路；我唔知爹地有幾叻，只係知佢好多年前就喺港大畢業，英文非常流利，會經常睇新聞同外國嘅政經雜誌，不過又有乜用吖，貪心得滯賭一鋪，咁就乜都無晒；而我媽咪呢，雖然好懶乜都唔做，剩係鍾意買嘢同吃喝玩樂，但其實佢都曾經係一個正式嘅大學生，只不過佢喺有咗我之後就輟學，反正有有錢佬養，就唔會想出嚟捱，讀書何用？