thriXt Qantasy 純文字安眠之作 (New: - U2K - 一直上架): 559

我走咗入去一棟幾舊下嘅商業大廈，呢度底嗰兩層都係商場嚟，都係賣下男人嘢多，例如相機，遊戲機，玩具，魔術鋪，當然重有啲潮物同埋平價首飾，喺唔起眼嘅角落重有間紋身鋪…不過呢度所有嘢都同我無關，其實我平時好少嚟呢啲地方。
雖然我唔算係弱質女流，但始終一個女仔都有啲驚；明明朗豪坊上面啲人身光頸靚，一落到嚟就變成三山五嶽咁…壞人都唔係最恐怖，最驚係啲奇形怪狀嘅黐線佬。
我用最短嘅時間搵到個電梯大堂，搭住一架頗為狹窄嘅舊（車立）上去上面嘅商業單位。
「叮噹。」等咗三秒大門就開啟。
妹：「お帰りなさいませ、ご主人様！」
我：「妳…妳好呀…」
妹：「原來係女主人！歡迎光臨，係咪第一次嚟㗎？等小妹自我介紹先，我叫做沙織，日文係讀做Saori（さおり）。」
我：「…，請問…呢度係咪有位何小姐？」
然後呢位小妹妹…呀，唔係…按道理佢應該係姐姐嚟嘅…只不過佢矮過我又細粒過我，心口平平成個傻妹咁；碌到隻眼大一大望住我，好似見到外星生物咁訝異。
妹：「妳係嚟搵女僕長嘅？」




我：「嗯…即係，妳哋話事嗰個…」
其實都幾佩服佢哋可以咁入戲…不過搵食艱難，如果連自己都呃唔到，又點去呃其他客人喎；至於女僕長又好，經理又好，老闆又好，差唔多都係同一樣嘢嚟嘅啫。
見到個傻妹樣嘅姐姐都可以喺度招呼人，我諗…呢度嘅話事人應該都幾nice嘅，不過始終都係第一次有求於人，所以我係有啲緊張嘅，希望我唔會遇到啲乜嘢唔愉快嘅經歷啦，但至少佢係一個女人令我點都安心少少。
妹：「妳係嚟見工嘅？」
我：「算係啦…」
妹：「嘩！咁妳入嚟坐低先啦，我入去同女僕長講聲，妳等一等呀下。」
然之後佢就捉住我手臂拉咗我入去，我有啲唔識分佢哋係真心定扮出嚟咁熱情，又或者已經自我催眠咗；當我坐低之後佢就開門走咗入去廚房。
呢度嘅環境我喺網頁同IG page度已經睇過下，嚟到實景之後同我嘅想像都無乜分別，佢扮到好似一間日本課室咁，一邊係黑板，用日文漢字寫住日期，天氣，值日生，來日邊個當值咁；重有一睇就知係女僕喺上面畫嘅公仔，客人嘅留言，重有個範圍係有啲玩嘢嘅數學公式同化學符號。
另一邊就係壁報板，上面有精美圖片組成嘅餐牌，一如我所料來來去去都係嗰十樣八樣嘢，包括咗蛋包飯，咖喱飯，肉醬意粉，炸薯餅，烤香腸，粟米忌廉湯，傻仔雜果沙律，牛奶布甸，色素梳打，當然重有咖啡同茶；我唔知質素係點嘞，不過我又唔係食嗰個，無乜所謂啦…反正呢啲嘢食要煮得難食都有一定嘅難度；而係壁報版側邊就有幾排客人同女僕影嘅instax相，當然寫滿密密麻麻嘅字。