thriXt Qantasy 純文字安眠之作 (New: - U2K - 一直上架): 533

嗰陣先生為咗想令我唔好咁繽紛，特意搵咗一個比較文靜嘅女仔嚟同我坐，但可想而知係一定無卵用的，八方開攻嘅我少咗一個方位唔會對我嘅課堂活動有乜實質嘅影響，而呢位婷婷同學就當然唔會滿意我嘅存在。
無所謂㗎，河水不犯井水啫。
點知有一次，我玩緊塗改液倒模期間，唔小心潑到佢條裙，重要係冬天深色裙，佢阿媽投訴我，班主任只得無奈再將我調位，結束咗我同佢短短兩個禮拜嘅相處。
我：「做乜喎…咁耐無見…」
W：「係呀，咁耐無見，以為你唔認得我添呀。」
自從五年班唔同班，直至到今年先同返班，咁我知佢喺同一間中學嘅，但無端端搵人把鬼咩。
我：「認得，諗住妳唔鍾意我吖嘛，咪無搵妳。」
W：「係唔鍾意你呀，但過咗咁耐，算啦。」
我：「婷婷同學對唔住呀，四年班件事係我錯。」
W：「都話算咯，過咗咁耐，重有唔好叫我婷婷同學。」呢個係佢小學用嘅名嚟。




我：「咁點嗌妳好，林韻婷？」
W：「咪嗌全名啦，重細咩…」
我：「嗌全名都幾親切吖，又後生啲。」
W：「我叫Wendy呀，你唔係唔知呀？」
我：「的確無乜印像，但放心，我會記住㗎喇。」
W：「你而家唔會再阻住我上堂㗎喇？」
我：「基本上唔會嘅…不過啱啱想懷念下。」
我喺筆袋攞咗枝標準透明原子筆出嚟，將個金屬筆尖扭鬆，用手壓住螺紋再用力一轉，個筆尖就好似爆旋陀螺咁喺我張枱面「窣窣」聲咁轉。
就連Miss都聽到奇怪聲音望一望過嚟，但既然唔係教緊書，佢都無理我嘅意欲。
W：「低B仔，玩咗咁多年都係呢啲。」




我：「妳鍾意點講就點講啦，而家都無人陪我玩。」以前攞住個秒錶大家鬥耐就已經可以玩足全日，而家個個都玩電話，想搵人陪我㧻下棋都唔易。
筆尖停定，我扭返實枝筆，望住窗口輕嘆。
W：「無得同女神坐啫，唔使死老竇咁樣呀？」
我：「唔係呀…唔關事…」
W：「乜你唔係鍾意人哋嘅咩？」
我：「吓…人哋女神嚟，我可以點鍾意人哋？」
其實我都知學校入面大把人講我壞話，明明咁多人鍾意佢，點解偏偏就要講我喎，我都只係咁有啱坐咗喺佢隔籬啫；本身鍾意靚女呢個行為就無傷大雅嘅，但為咗唔會令到任何人起疑心，所有嘅傳言我當然會一律否認。