為了實現媽媽遺願，我成為了女兒國唐僧: 532

傻嘅咩，已經日日喺屋企對住啦…係呀，無錯，我鍾意QQ嘅程度，就係鍾意到想朝見口，晚見面，最好日日可以攬住一齊瞓。
鄧：「嗱，新嘅坐位表你哋就睇出面屏幕啦，而家重有廿分鐘先放學，不如就搬埋嘢，大家適應下先，如果唔係放完假返嚟個個喺度趕功課先調位就亂上加亂㗎喇。」
Q：「以後要好好照顧自己喇，再見。」
我：「嗯，我會記得妳㗎喇，再見。」
調位，對先生嚟講可能只係家常便飯嘅指定動作，但對好多人嚟講，調位分分鐘意味咗換朋友，換圈子，換生活態度，換情人，甚至係生離死別；如果QQ屋企無落難，唔知會點呢？應該都會friend到嘅，互相鬥氣串來串去嗰隻friend掛，都會唔捨得有個靚女離開自己嘅，但絕對唔係而家呢種感受。
我望下出面個display，搵到自己個名，今次坐前咗一行，去咗窗口位…呢個位望到出面風景，對面啲樓，再加樓下籃球場，對讀書嚟講實乃一大障礙，再睇下同邊個孖位先…「林韻婷」。
噢，竟然係佢，既來之則安之。
然後整間班房進行動物大遷徙。
一路搬就一路望，發現QQ去咗門口嗰排，都唔使去到咁遠呀…天各一方！Miss Tang係咪有心玩嘢？不幸中嘅大幸係佢同女仔坐，不過其實都無乜分別，佢早就有男朋友，社長又成日煩住晒，同仔定同女坐實則都係一㞗樣。
最重要嘅係佢始終係我屋企人。




我：「Hi，婷婷同學。」都要打個招呼先。
W：「Hi乜嘢Hi，低B仔。」
林韻婷，呢個女仔我係識嘅，都有啲歷史淵源，但絕對唔可以叫做熟。佢同我同一間小學，由於小學設精英班制度，成績不濟無心向學嘅我就長期處於D班嘅遊樂精英班，喺四年班嗰一年呢個女仔由C班跌咗落嚟D班，重有幸同我坐咗兩個禮拜…
當年小朋友，自然就唔會有啲乜埕埕塔塔嘅嘢，大家就唔好諗埋一邊，嗰啲小學生揭裙底，互相除褲交換睇器官，男女混閹大亂鬥…通通都是不存在的。
當年嘅我玩緊乜呢，身為文具專家嘅我…就有切擦膠碎整意粉，間尺橡筋槍同間尺竹蜻蜓，旋風筆尖陀螺，真空筆蓋吸脷拔罐大法，鉛芯插原子筆芯羽毛筆書法，塗改液倒模加鐵芯抽取，橡筋綑筆大格鬥…
嗯，從文房四寶都可見到我讀書非常有一套。