為了實現媽媽遺願，我成為了女兒國唐僧: 522

我喺度幻想，QQ以前喺舊居，一家人食完飯之後，工人就會執枱洗碗；而QQ就應該會練琴，部三角琴位於一個寛闊客廳嘅一角，佢坐落去之後雙手就開始喺琴鍵上起舞，奏出一段段悅耳動聽嘅音樂；佢身邊會係一大幅嘅落地玻璃，拉開薄紗就會睇到出面嘅露台同埋對開一八百十度嘅無敵維港大海景。
唓，好叻咩？我畀幾蚊雞上天星小輪有三百六十度添呀！
不過呢，我記得QQ講過佢以前要不停彈古典練習曲，又悶又辛苦，彈到發䒐䒏添…其實嚟咗之後佢都無乜提以前屋企啲嘢，我唔知佢究竟係其實唔太鍾意以前嗰種活在籠裡嘅生活吖，定係因為而家嘅生活落差太大而又無法改變所以絕口不提以前嘅金碧輝煌。
又唔係無嘅，只係見佢食文華廳蝦餃定係公仔點心都好似一樣咁開心…
總之可以睇到佢笑，每日正常咁生活，我就已經覺得好滿足；除咗見到佢同瘟神有講有笑，同男朋友有正常嘅性生活…咁樣會令我思想好唔平衡。
爹地佢都玩得好開心，點完一首歌又一首，呢種溫暖嘅家庭生活彷彿第一次出現喺呢間屋咁。
Q：「弊，唔記得咗啲嘢添。」
我：「做乜呀？唔係做晒功課喇咩？」
Q：「我同咗阿健講差唔多做完功課就通知佢今晚打機，補償返琴日掛機嘅錯誤。」
我：「妳一早就已經做晒啦。」




Q：「關乜事喎，咁我要安排㗎嘛…我叫佢十五分鐘之後online啦。」真係識吊人癮嘅啫。
我：「隨便妳，我已經入咗game清緊日任。」
Q：「咁我同佢講喇，你自己見機行事，唔好講錯嘢，琴日我哋一齊掛機已經好大鑊…」
爸：「噢，你哋有嘢忙，約咗人就去忙啦，不過…你哋係講緊打乜嘢game呀？」
我：「傳說囉，你唔識㗎喇…」
爸：「點解我一定唔識傳說對決？」
我：「吓！原來你識㗎？！」
爸：「咪以為我剩係識街霸同king fight至得㗎…」
我部電腦除咗有玩Steam之外，重裝咗個街機模擬器，入面係得幾隻game，其中兩隻係KOF97同埋pocket fighter，我老竇叫我幫佢搵嘅，都幾好玩嘅，但由於啲畫面實在係太古舊，我玩一陣就玩唔到落去；我同過佢講不如喺Steam買新嘅KOF十幾又或者街霸五，或者download翻版都得，佢又話唔使，打機係想懷舊下。
唉，講起KOF，而家十五都出，不過唔太啱我，加埋新game又係keep住天價。




我：「隻game咁紅，識又的確唔出奇嘅…」
爸：「我識玩添㗎，船上面有個台仔同事送咗個小號畀我，入面已經有好多個角色。」
我：「竟然有咁好嘅事？要儲好耐錢買㗎！」
爸：「係呀，我開畀你睇下嘞。」
果然，最common嗰三十幾個角色都齊，而且免費skin加埋平價skin都有二三十個！好彩，都重係少過我，如果唔係就實在太過羞家。