為了實現媽媽遺願，我成為了女兒國唐僧: 521

我望住個醬油架，鹽糖胡椒麻油辣椒油豉油蠔油，重有一樽我買嚟炒公仔麪或烏冬用嘅咖喱汁，順帶一提我係會咖喱，沙爹，黑椒三揀一用完一樽先再買另外一樽。
我：「爹地，你頭先啲海鮮點炒出嚟㗎，無見你買相應嘅醬料放喺度嘅？」
爸：「嘿嘿，好簡單啫，經過酒樓搵馬神執畀我咪得囉！」佢重要擺出一個V字形手勢。
我：「吓！乜嘢話！咁都得？」
爸：「好應該吖，我仔仔話晒幫緊佢手做嘢。」
我：「你唔好叫人撈埋啲蝦出嚟畀你。」
爸：「咁又無咁過份嘅。」
我：「都好，我幾驚要係咁整豉椒排骨。」
爸：「就係知你平時唔多用得著先唔買咋，不過呢啲嘢其實放到兩年，都無乜所謂嘅。」
我：「放咁耐就唔太好啦，又阻埞。」




然後我縮返個頭入去廚房。
Q：「喂，我鍾意食豉椒排骨㗎喎。」
我：「呢個…弊在煮出嚟好麻煩吖嘛。」
試諗諗，烚幾粒雲吞或者貢丸同蒸豉椒排骨嘅分別，就算洗碗都麻煩一倍啦，排骨咁油。
Q：「理得你，畀我知道咗你識煮你走唔甩㗎喇。」
我：「呢個…有機會嘅，煮到無嘢好煮先啦。」
其實唔會唔識煮，因為百佳都有啲執好晒一pack就咁蒸完就食得嘅組合，不過都唔平，差唔多要成三十蚊，呢個價我實在唔明點解唔去斬叉燒算，煮都唔使煮，實在係完美！
Q：「我就嚟洗完碗㗎喇，你出返去啦。」
我：「咁咪等妳洗埋先囉，我都無嘢做。」
Q：「平時又唔見你喺度日日陪我。」




我：「平時三分鐘都洗完啦…而家，留喺度陪妳會令我安心啲。」唔知呢，等老竇以為我哋friend啲掛，出去又唔知佢會唔會同我講乜…
終於我哋洗完碗一齊出返去。
爸：「係呢，Queenie，唔知我有無機會聽下妳彈琴呢？」嘩，做乜咁突然呀，老竇…
Q：「可以呀，叔叔，你想聽我彈乜呀？」
爸：「咦，有得點歌添呀，係咪要新歌先得？」
我：「唔使㗎，Queenie佢聽過首歌就識彈㗎喇。」
爸：「啊，原來小妹妹妳咁犀利。」
Q：「哎呀，唔好聽佢亂噏呀，好簡單嗰啲先得。」
我：「邊係啊，紅蓮華咁難妳都彈到咯。」
Q：「咪玩啦，我簡化到三份一都無先彈到咋。」




爸：「唔使驚，好簡單㗎咋，《真的愛妳》得唔得呀？」
Q：「真的…啊，係咪即係Beyond嗰首？」
爸：「Exactly！咁妳應該聽過㗎啦？」
Q：「聽過呀，不過你要畀啲時間我諗諗先。」
然後QQ就坐埋電腦前面，一路想象首歌係點，啲手指郁下郁下咁；由於部keyboard而家駁咗落電腦，所以佢就索性喺Synthesia入面彈喇。
但係，我就諗唔起真的愛妳係邊首歌嚟嘞。
直到QQ開始彈起咗第一句嘅音符。
我：「啊，原來係無法可保釋因衰劈友…」
爸：「衰仔你講乜呀？」同一時間QQ都反晒白眼。
Q：「小心激到你媽咪報夢鬧鬼死你呀。」
我：「哦…我錯囉。」