為了實現媽媽遺願，我成為了女兒國唐僧: 507

我：「唔係㗎…原本諗住過嚟兩三晚，佢先至懶得攞埋啲衫嚟啫…」
爸：「即係部琴係佢嘅？」
我：「當然啦，我鬼識彈琴咩。」
部琴就當然係屬於佢㗎啦，但我就唔話係我買畀佢喇，費事爹地覺得我使咗好多錢喺呢個女仔身上，唔想影響佢對QQ嘅觀感。
爸：「又識彈琴，又咁靚女，真係好吸引。」
我：「你想講乜喎…唔止添，佢讀書都好叻。」
爸：「真係㗎？」佢一面興奮咁。
我：「係呀，佢keep住全級頭十名左右囉。」
爸：「咁係咪你同佢一齊溫書所以成績好咗？」
我：「都算係嘅，咁無理由…佢晚晚喺度溫書，而我就係咁玩嘅，加埋佢都會教我。」




爸：「咁樣，又真係好唔錯喎…不過，雖然佢好正，
拜託你千祈唔好對佢亂嚟呀…」
我：「做乜啫…咪話咗我哋只係普通同學。」
爸：「我知呀，但我亦都知…有啲嘢好難忍㗎嘛。」
我：「知喇知喇，唔使同我講，媽咪佢已經提早同我講咗，我唔會亂嚟…」
爸：「吓！原來媽咪咁料事如神㗎？」
我：「唔知呢，可能係咁啱嘅啫，Queenie佢…重已經睇晒媽咪啲信。」
爸：「竟然…都好嘅，咁你記得聽媽咪話喇，知唔知？」幾經辛苦我終於吞晒QQ啲剩飯。
我：「嗯…幾時有唔聽佢話喎。」
我覺得自己咁嘅家境同條件，無為非作歹，打家劫舍，偷呃拐騙，結黨入社，種草食草已經算叫做好乖，係讀書差咗少少啫；不過自從QQ住喺度之後，所有嘢都好咗，我又學識返工搵錢知道咗好多嘢，睇嚟希望在明天。




爸：「其實你媽咪以前讀書都叻過我一截，唔明佢點解會揀咗我。」
我：「如果讀書唔叻就唔會走去教書啦。」
爸：「唔通…係貪我有間公屋？」
我：「係咪呀…邊有啲咁老套嘅故仔㗎。」
爸：「唔知呢，嗰陣我啱啱讀完職業訓練局出嚟做嘢，阿爺同阿嫲見我哋大個晒決定返廣州養老，我呀妹你姑姐佢一直頂唔順咁多人住埋一齊，好早就周圍住喺啲男朋友度，大伯佢做生意成日周圍走…結果得返我自己一個人住喺呢間原本塞咗五個人嘅公屋，哈哈，更諷刺嘅係我竟然去咗行船，一個月都無幾日喺度…嗰陣你阿公重在生，媽咪同佢嘅關係又好麻麻，咁啱我又同你媽咪熟咗，咪提議佢得閒上嚟用下啲水電唔好俾房署check到間屋無乜人住，點知就搞到好似慫恿佢離家出走咁…」
我：「喂喂喂！乜有啲咁嘅事？你唔係…見媽咪咁樣然後又懷疑Queenie呀？！」