為了實現媽媽遺願，我成為了女兒國唐僧: 506

Q：「喂！起身呀！食嘢喇！」
我：「嗯呵…搞…乜呀…嗯呼…」
Q：「有嘢食呀！起身趁熱食！要返學喇！」
想嗌救命，又到咗最痛苦嘅時刻，一方面當然想繼續賴床，但另一方面又聞到食物嘅香氣。
喺呢個靈魂拷問嘅時間，通常都要喺被竇入面掙扎大概廿七秒到四十九秒…
我：「早晨爹地…早晨Q…Queenie…」
其實我平時又有乜可能同Queenie講早晨，就算老竇都未必講，不過佢兩個一齊喺度，把口好自然就講咗出嚟。
QQ已經沖完涼換好咗件校服，個頭重係濕嘅狀態，拎住個風筒準備吹頭；枱面上放咗兩隻糯米雞喺度…我唔係太明爹地做乜會朝朝都落去買早餐畀我，就好似幻想我食完就會畀心機讀書咁；當然就唔會每一日都係糯米雞嘅，有炒麪配燒賣、有炒米粉配牛肉球、有牛肉艇仔粥、有潮州粉果拼腸粉…睇嚟係run咗一個cycle而家又返到嚟糯米雞。
爸：「真係好，有Queenie喺度幫手叫你起身，慳返我好多口水。」
於是我就迮迮臨入去廁所洗面（口浪）口，出返嚟食糯米雞，QQ佢就一路吹頭一路食糯米雞，而爹地就坐返喺床上面睇我哋食早餐，準備等我哋返學之後佢又會瞓返。




呢種感覺太好，可以同QQ一齊生活就已經好足夠，不過由於多咗老竇喺度，所以我哋都無乜嘢講。
Q：「好喇，我飽咗，你幫我食埋佢啦。」
我：「妳…食晒啲餡，剩返啲米喺度算係點？」
Q：「我食唔到咁多嘛，我知你會食㗎喇，你唔會浪費食物嘅…咁我出門口先，多謝叔叔嘅早餐，放學再見喇，bye bye。」講完佢就出咗門口。
剩返爹地喺度睇我食雞。
爸：「呀仔，點解你哋唔一齊出門口返學嘅？」
我：「係咪玩呀…點可以俾人見到我哋兩個一齊喺條街度呀！我同佢只係普通同學嚟㗎咋，如果有人知道我哋一齊住好大鑊㗎。」
爸：「又係喎…咁你哋要小心啲，千祈唔好俾人發現。」
我：「咁呢個就梗㗎啦…」我都唔敢講班主任已經知道咗。
然後我又繼續食埋QQ隻糯米雞底。




爸：「睇嚟你哋兩個真係相處得幾好咁喎。」
做乜咁講…因為我有得食佢嘅口水尾？
我：「算係咁啦，都已經幾個月，乜都慣晒。」
爸：「慣到佢著埋你啲衫？」