為了實現媽媽遺願，我成為了女兒國唐僧: 508

爸：「唔係喇，同埋嗰陣你媽咪都教院final year，識得自己照顧自己，去邊住都得啦，點同你哋得十四五歲，好令人擔心㗎嘛…不過，如果間公屋可以繼續幫到你嘅話我都會深感欣慰嘅。」
我：「哎呀，我無你咁好彩，勸你唔好幻想太多，Queenie都講過希望盡快自己照顧到自己，就唔使留喺度麻煩我…係呢，乜呢間屋住到五個人㗎？」
爸：「嗯，以前你張床係鐵框碌架床嚟，大伯瞓下面，姑姐瞓上面，呢個位無電腦就放咗張伸縮床係我瞓嘅，不過到我初中已經頂晒腳，有時會晾隻腳出嚟…」
我：「我知要塞實塞到，但無擠迫戶調遷㗎咩？」
爸：「申請過一次，亦都有派到，但係喺天水圍，而且只係大一百呎唔夠…諗來諗去覺得無乜著數，搭車嘥時間又嘥錢就放棄咗。」
我：「原來…都明嘅。」
爸：「推過一次之後要等好多年先可以再申請，後尾你姑姐考A level嗰時索性住咗喺條仔度，大伯又時不時去外國實習進修，之後兜兜轉轉間屋就無咁迫，所以亦都無再申請。」
我：「咪住咪住？！考A level就…住喺條仔度？」
爸：「你…使唔使咁驚訝喎…嗰陣爺爺嫲嫲都好大反應㗎，不過你姑姐天生就反叛，加上生活環境迫人，同埋佢都已經十八歲，鬧咗幾次之後，又覺得佢男朋友都算正常，咪由得佢囉。」
我：「即係我姑丈？」




爸：「哈哈！梗係唔係啦！俾人玩咗半年就分咗手喇，返嚟住嗰陣咪俾老竇老母鬧，我都有份笑佢，搞到佢嬲爆爆咁。」
我：「好一個混吉嘅故事。」
爸：「不過姑姐佢好犀利，唔夠一個月就再搬去第二條仔度住，嗰陣我哋都慣晒無佢符，後尾佢大學住宿舍就更加管唔到。」
我：「乜…咁多女仔都係咁嘅…」
爸：「我諗咁啱啫，但大個咗之後就會覺得無乜嘢，其實好小事，唔玩到爆鑊咪得囉…喂！不過你唔好學呀，對住女仔要正正經經，知唔知呀？如果唔係媽咪佢唔放過你呀！」
我：「我無做壞事囉…咁爹地你…明明琴晚重喺廣州食飯，點解要咁急漏夜返嚟嘅？」
爸：「哦，我見有架特快高鐵喺廣州九點半開，唔使一粒鐘就返到嚟九龍，咪貪得意搭下囉。」
我：「好無聊…嘅原因。」
爸：「係嘞，乜你唔係要返學嘅咩？」
剎那間，我個額頭多咗好多滴冷汗同直線。




我：「弊！得返五分鐘！」
我拜拜都懶得講就奪門而出，荒謬的我…明明學校就喺自己屋企樓下，而我竟然要飛奔落去；我成日都諗，如果可以喺窗口搭條威也去學校就正，五秒唔使就可以飛到返課室，就算大閘閂埋我都可以唔使驚。