為了實現媽媽遺願，我成為了女兒國唐僧: 494

我：「我屋企唔係陋室，嘻嘻。」
Q：「你又想講乜呀？」
我：「因為我屋企可以俾妳調素琴囉。」
Q：「乜唔係絲竹亂你耳咋咩？」
我：「唔係呀，我好鍾意聽妳彈琴㗎。」
其實呢…開初對於佢彈琴其實覺得無乜特別，我又唔識音樂嘅，只係諗住求祈買件玩具畀佢等佢唔好咁唔開心；但日子耐咗，又知道原來媽咪佢都會彈下琴，我就覺得彈琴嘅QQ好靚。
Q：「多謝你嘅賞識喎。」
我：「屋不在大，有Q則名。」
Q：「我唔想出名囉，惟吾德馨就得。」
我：「其實惟吾德馨係點解？」




Q：「你呀！唔想自己屋企係陋室就畀心機讀書啦，如果唔係你成隻白丁喺度點唔陋室喎？」
我：「我先唔係白丁囉！」
鄧：「呀爽你乜事呀？！謦夠欬未？」
死火，一時激動得滯大聲咗添；但係，明明謦欬就係兩個人先可以完成嘅任務，點解次次都剩係鬧我，唔通白丁真係好恰啲嘅？
我：「Sorry呀，Miss Tang。」
鄧：「你話你唔係白丁，咁請你解釋一下白丁呢兩個字係點解？」做乜難為我喎…又要答問題。
我：「嗯…我諗呢，一個白癡又目不識丁咪叫做白丁囉。」
「哈哈哈哈哈哈哈…」歡樂的課室…
鄧：「你究竟係認真定玩嘢呀？」
我：「我覺得…唔係應該差唔多意思咩？」




鄧：「白丁係指不學無術，無功名嘅人呀！」
我：「咁同唔識字嘅白癡都係差唔多啫…」
鄧：「唔得閒同你討論，唔該你安靜乖乖聽書。」
乜喎，明明就係差唔多，古代嘅白丁嚟到現代咪叫做白癡囉，都係歧視人啫。
話咁快就到咗小息。
健：「落唔落去食嘢呀。」
我：「落囉，不過我食飽咗喇。」
康：「吓，你竟然食早餐！太陽由西邊升起？」
健：「你老竇返咗香港呀？」
我：「係呀，呢兩個禮拜都會喺屋企。」




落到去，我當然就唔會買嘢食啦，慳得一蚊得一蚊，點知QQ又會有啲乜嘢需要。
健：「係咪好開心呀，有人返嚟照顧你喇。」
我：「都係咁啦，係唔使煮嘢畀自己食囉。」
康：「唉，我都好想可以自己一個住。」