為了實現媽媽遺願，我成為了女兒國唐僧: 493

其實，有爹地喺度都唔錯，又有禮物收，想食乜就食乜，又唔使自己走去買餸；不過，工都係要返嘅，呢兩個禮拜可以慳返多啲錢嚟助養無家可歸的女童。
夜晚嗰陣有諗過搵唔搵QQ好，不過佢都無搵我，無端端關心佢好似有啲假，都係等聽日返到學校先睇下佢點樣。
唔好以為無QQ喺度就無人叫我起身…
爸：「交叉仔，起身喇，有糯米雞，快啲出嚟趁熱食呀！」七點半未夠就打鑼打鼓咁。
對於呢個早餐，我實在係又愛又恨…冬天凍冰冰，我當然就想喺被竇入面綣到最後一分鐘啦，反正我平時就唔會提早起身食嘢㗎；但係…樓下酒樓朝早嘅糯米雞真係幾好食，只限朝早供應，入面塊厚火腿、冬菇、臘腸、肥豬肉絲…絕對唔係便利店嗰啲肉碎味精撈糯米飯可以比較；所以，我都係一嘢踢開張被起身吔雞去。
由於趁熱食，所以我牙都未擦…面都未洗…
重要夾實條小雞雞，費事老竇知道我朝氣勃勃，好在天氣凍冰冰，加埋一食嘢就即刻冷靜返。
而老竇就上返床瞓覺，我實在唔明咁樣特登早起身落去食早餐有乜意義？定係…佢係純粹想落去買嘢返嚟畀我食…
食完雞，一切如常，梳洗著衫上學去。
QQ當然一早就已經返到去，個樣有啲攰咁趴咗喺枱面。




我：「妳無乜嘢吖嘛？」
Q：「無乜特別，唔夠瞓啫。」
我：「點解唔夠瞓嘅？佢哋好嘈？」
Q：「唔係…我瞓廳嗰張梳化床，所以都要等佢哋瞓晒熄晒燈我先有得瞓，咁我朝早又要沖涼，又唔可以用晒佢哋啲熱水，唯有再早多十五分鐘起身，不過都無乜分別，熬巴士返嚟都成九個字。」
聽到佢咁講，我諗起都覺得辛酸，睇嚟我間屋對佢嚟講真係可以算係五星級的家。
我：「放心啦…捱多十二晚，妳就可以返嚟瞓㗎喇。」
如果可以交換，我寧願放棄display卡，朝早唔食糯米雞，嚟換返QQ安穩舒適嘅生活。
Q：「嗯，之前都係咁，適應下就得。」
講完佢就繼續伏喺枱上面休息，對女仔嚟講佢哋就係有呢個特權，其他人只會認為佢哋嚟M，所以身為女人嘅Miss Tang亦都容忍佢成節班主任節喺度攤屍，如果係我嘅話可能又會俾佢一本中文書拍落個頭上面。
今日教嘅課文係劉禹錫嘅陋室銘，雖然唔係好睇得明篇文講乜，都知道係關於一間爛屋；然後我又諗起自己個狗竇，細細一間豆腐膶兼且亂七八糟；畀著以前，我一定唔會敢邀請啲女神嚟自己屋企，就算佢哋唔會睇唔起自己，我都會唔好意思啦，加上我亦都唔想招呼佢哋同睇佢哋嘴面。




估唔到而家狗竇會變咗右女神嘅屋企，更想象唔到嘅係我哋兩個可以相處得咁好。